Pas rezultateve zhgënjyese, Chelsea ka shkarkuar trajnerin Thomas Tuchel.
Lajmi është bërë i ditur nga klubi londinez, ku theksohet se trajneri gjerman është pjesë e historisë së klubit me të cilin arriti të triumfojë në Champions League dhe Kupën e Botës për Klube.
Në 6 ndeshje në Premier League, Chelsea ka marrë 10 pikë, me 3 fitore një barazim dhe dy humbje. Goditja më e rëndë ishte humbja e së martës në ndeshjen e parë të grupeve në Champions League, ku “Blutë e Londrës” u mposhtën 1-0 në Kroaci nga Dinamo e Zagrebit.
Tuchel ishte ai që vendosi të mbajë në ekip sulmuesin shqiptar Armando Broja, por deri në këtë fazë të sezonit, ai e ka aktivizuar shumë pak gjigantin e kombëtares shqiptare. Emri i trajnerit të ri ende nuk është bërë i ditur.
