Manchester City e ka mposhtur Liverpoolin me rezultat 4:1 në derbin e javës së 23-të të elitës së futbollit anglez.
Për Cityn ishte fitorja e parë në “Anfield” në kuadër të Premier Leagues, pas vitit 2003.
Ndërkaq, për Liverpoolin disfata e tretë radhazi në shtëpi.
Ilkay Gundogani i Man Cityt humbi penalltinë në minutën e 37-të, duke gjuajtur jashtë portës.
Atë që nuk ia doli ta bëjë në fund të pjesës së parë, Gundogani e bëri në fillim të pjesës së dytë. Ai shënoi nga afërsia në minutën e 49-të për epërsinë e Cytyt.
Liverpooli ia doli që të barazojë rezultatin në 1:1 në minutën e 63-të. Mohamed Salahu e fitoi vetë penalltinë, të cilën e shndërroi në gol.
Kjo ishte krejt çka bëri skuadra e trajnerit Jurgen Klopp në këtë ndeshje, pasi City shënoi edhe tre gola të tjerë, fal edhe gabimeve trashanike të portierit Alisson Becker.
Degazhimin jo të mirë të portierit Alisson, e shfrytëzoi Phil Foden, i cili asistoi për Gudeoganin që shënoi golin e dytë personal dhe të dytin për Cityn.
Golin e tretë e realizoi Raheem Sterling në minutën e 76-të, pas asistimit të Bernard Silvas. Edhe te goli i tretë gaboi portieri Alisson.
Ndërkaq, golin e katërt dhe të fundit për fitoren bindëse të ekipit të trajnerit Pep Guardiola, e shënoi Phil Foden, i cili ishte ndër lojtarët më të mirë në fushë.
Xhederdan Shaqiri, luajti nga minuta e 68-të.
Me 50 pikë, Manchester City është lider i Premier Leagues, me një ndeshje më pak se sa Manchester Unitedi që është i dyti.
Ndërkaq, Liverpooli zë vendin e katërt me 40 pikë.
