Nëse do të ulesh vetëm për vetëm dhe do të vëzhgosh me qetësi, gjakftohtësi, pa-anshmëri partiake, mendje të hapur dhe logjikë të shëndoshë të gjithë situatën e përgjithshme të vendit tonë në çdo 28 NËNTOR, do të shikosh dhe dëgjosh lart e poshtë nëpër media, rrugë, rrjete sociale, bashkëbisedime, emisione, vetëm fjalë, llomotitje, kakofoni, llafe boshe, zbrazëti, boshllëk, zhurmë, rrëmujë, kaos, idiotësi, rrugaçëri, fallcitet, mani për t’u dukur, babëzi, grykësi, humbje kontrolli, ngritje flamuri dhe shtizash, ulërima, çjerrje, DERI NË KUFIJTË e një SKIZOFRENIE KOLEKTIVE – mos harroni tortën e famshme të pavarësisë se çfarë situate tragji-komike u krijua me “tortën e pavarësisë” që shkaktoi një situatë mjerane se ku u katandis festa dhe festimi i pavarësisë.
Vërehet qartë se në vend mbizotëron një mendjelehtësi shoqërore, mos-ndërgjegjësim i gjithanshëm rreth realitetit, diz-informim për kuptimin e vërtetë të fjalës dhe konceptit PAVARËSI dhe SOVRANITET, ka një përhapje më tepër dogmatike të mburrjes dhe lavdërimit popullor, një patriotizëm teorik vetëm me fjalë ndërsa veprimet konkrete në terren të njerëzve tregojnë krejt të kundërtën. Në MEDIA njerëzve u serviret një patriotizëm fasadë prej kartoni dhe një nacionalizëm i padobishëm, ndërkohë që nga ana tjetër, Shqipëria vazhdon të boshatiset me ritme të shpejta.
Të gjitha këto fenomene, janë vetëm shfaqje dhe show që shërbehen për opinionin publik në emër të një pavarësie e cila fatkeqësisht ka rezultuar se është totalisht e VARUR nga FUQITË E MËDHAJA të CILAT ishin ato që i NDANË dhe COPËTUAN TROJET SHQIPTARE me një marrëveshje të madhe ndërkombëtare anti-shqiptare në kurriz dhe në dëm të interesave të Shqipërisë dhe Shqiptarëve për të përmbushur kërkesat e Rusisë dhe aleatëve të saj Sllavo-Ortodoks në Ballkan si Serbia, Mali i Zi, Maqedonia dhe Greqia dhe për të kënaqur ambiciet e tyre shoviste ekspansioniste anti-shqiptare duke shkëputur nga trungu i trojeve shqiptare rreth gjysmën e territorit e për t’ja dhuruar ato shteteve armike shekullore të Shqipërisë dhe shqiptarëve.
– Po atëherë për çfarë pavarësie po flitet dhe festohet vallë ?!
– Po për çfarë PAVARËSIE po flasim atëherë kur shteti shqiptar dhe institucionet vendimmarrëse nuk kanë dot PAVARËSI SOVRANE në vendimarrje për çështjet e rëndësisë së veçantë strategjike kombëtare si për nxjerrjen, menaxhimin, shfrytëzimin, përdorimin dhe shpërndarjen e pasurive kombëtare siç janë: energjia, deti, karburanti, mineralet si floriri, hekuri, çeliku, kromi, nikeli, qymyri, pasuritë e paluajtshme në zonat bregdetare, male, fusha dhe kodra, në lumenj dhe përrenj, në burimet ujore, në bujqësi dhe blegtori, portet dhe aeroportet, duke i dhënë ato në përdorim me ligj tek kompanitë e huaja dhe ato vendase e duke e shpërndarë kështu pasurinë kombëtare në duart e një grushti njerëzish të cilët njihen si Oligarkë dhe Oligarki në dëm të shumicës së popullit.
– Për çfarë PAVARËSIE po flasim kur shteti shqiptar nuk merr dot kurrë një vendim të mirëfilltë të lirë dhe të pavarur as për politikat e zhvillimeve kombëtare strategjike brënda vendit dhe as për qasjet, qëndrimet apo strategjitë gjeopolitike në raport me botën e jashtme, pa pyetur njëherë më parë pikërisht ato AMBASADAT e vendeve e të ashtuquajturve “Aleatë Strategjikë Perëndimorë” dhe pa marrë lejen dhe miratimin e tyre, të cilët i ndanë dhe COPËTUAN tokat shqiptare në konferencën e Ambasadorëve të mbajtur në Londër në vitin 1913.
– Po atëherë çfarë lloji pavarësie gëzon de fakto vendi jonë kur SOVRANITETI SHTETËROR dhe ai KOMBËTAR është dorëzuar tek shtetet e tjera dhe janë pikërisht ato që marrin vendimet për drejtimin e Shqipërisë
në fushën e politikës së jashtme, të mbrojtjes, atë të sigurisë kombëtare, shërbimet inteligjente, ekonominë, drejtësinë etj na i drejtojnë ambasadat e shteteve të huaja se: çfarë, kur, ku, si, sa dhe në ç’mënyrë duhet zbatuar veprimtaria e mbarëvajtjes shtetërore dhe ligjzbatuese ndër institucionale në vend.
– Për çfarë lloji pavarësie po flitet kur për një të ashtuquajtur “REFORMË në DREJTËSI” për miratimin e së cilës u desh që të ngriheshin duart lart dhe kartonat PRO të të gjithë 140 deputetëve të Kuvendit të Republikës së Shqipërisë nga frika dhe kërcënimet e hapura dhe të fshehta të ambasadave të huaja ndaj tyre që nëse nuk e miratonin “REFORMËN NË DREJTËSI” do të kishin pasoja të rënda serioze ligjore dhe politike ?!
A mund të quhet PAVARËSI kjo ?!
Nga ana tjetër:
NDËRKOHË REALITETI NË JETËN E PËRDITSHME “të patriotëve” gjatë gjithë vitit është një aktivitet jetësor i mbushur me veprime krejtësisht jo-patriotike dhe një mentalitet anti-shqiptar.
Shqiptarët në shumicën e tyre nga të gjithë treguesit, statistikat, sondazhet dhe anketat vazhdojnë të jenë të bindur dhe të THONË që ky vend nuk bëhet, thonë se këtu çdo gjë ka marrë fund, njerëzit të gënjejnë, të mashtrojnë, ta hedhin në tregti, ta fusin në një bashkëpunim, të vjedhin, të grabisin, shikon dhe ndjen rreth e rrotull në shoqërinë shqiptare era krim, korrupsion, trafik droge, prostitucion, kërcënime, kanosje, pengmarrje, plagosje, vrasje, grupe mafioze, banda kriminale, të fortë lagjesh dhe zonash të qyteteve kryesore të vendit, ndajnë tenderat me politikën dhe ushtarët e tyre.
Kështu në këtë mënyrë “patriotët e festave 28 – 29 Nëntor vjedhin, grabisin, plaçkisin, rrënojnë, shkatërrojnë, boshatisin, shpopullojë dhe falimentojnë vendin dita ditës dhe vit pas viti dbs pastaj të vrasin për “atdheun” pothuajse të gjithë PËRVEÇ atyre që ka mëshiruar Zoti dhe i ka ruajtur:
KUSH ËSHTË KORRUPTUAR DHE INKRIMINUAR NGA SHTRESAT E POPULLSISË ?!
Mësuesit, Pedagogët, Mjekët, Infermierët, policët, gjykatësit, prokurorët, avoketërit, gazetarët, analistët, media, administrata, doganat, ministritë, drejtoritë, kompanitë shtetërore dhe private, tregtarët, biznesmenët, fermerët, fshatarët,
PO KUSH KA MBETUR ATËHERË ?!
TANI, KUPTOHET JO TË GJITHË…. SE KA EDHE NJERËZ TË NDERSHËM, mirëpo PËRQINDJA E POPULLATËS QË ËSHTË KORRUPTUAR DHE INKRIMINUAR është e MADHE dhe e FRIKSHME, prandaj Zoti i Madhëruar u ka dhënë shqiptarëve ata politikanë dhe udhëheqësa që kanë merituar sepse po perhapet dhe shtohet e keqja, ligësia dhe pisllëku ndërkohë që po pakësohet e mira, ndershmëria dhe fisnikëria përditë e më shumë dita ditës mjafton të shikosh se çfarë bëhet nëpër shkolla, rrjetet sociale dhe rrugët e qyteteve dhe e kupton se deri në çfarë gjendje është katandisur ky vend.
Unë si shqiptar i dobët, modest dhe i pafuqishëm për të ndryshuar dot të gjithë të keqen që ka përshirë dhe pushtuar vendin tim e them me krenari dhe mburrje që jam i lumtur dhe krenar që jam shqiptar kudo që ndodhem, mirëpo po ashtu e them se brënda shqiptarëve ka shumë maskarenj, të poshtër, servilë, spiunë, patronazhistë, që heshtin ndaj të keqes, bëhen palë me atë, e luftojnë të mirën dhe e pengojnë atë përhapjen e saj.
DERI KUR KËSHTU O NJERËZ ?!
Ngelët duke ngritur flamuj, gishta dhe shkopinj, ndërkohë që politika po u ndjek dhe shporr nga vendi juaj dhe trojet tuaja me ligj dhe me maligj, me hir apo me pahir, po ju përdor si leckë dhe pastaj po ju hedh në koshat e harresës dhe riciklimit të brezave ndërkohë që ju vazhdoni të mbushni sallat, sheshet dhe kutitë e votimit për ata që janë miq, partnerë strategjië dhe aleatë pikërisht me ata të cilët e ndanë Shqipërinë dhe trojet shqiptare në copa dhe pjesë.
Zoti e udhëzoftë në rrugën e drejtë dhe e përmirësoftë gjëndjen e popullit shqiptar dhe na ruajtë nga lajthitje kolektive e cila po perhapet me shpejtësi në të gjitha aspektet dhe fushat dhe shtresat shoqërore.
