Lufta në Ukrainë ka sjellë frikë për rritje të mëtejshme të çmimit të naftës. Sot në bursa, çmimi i naftës për një fuçi arriti në 113 dollarë. Para nisjes së luftës ishte 96 dollarë për fuçi. Nafta ka arritur aktualisht nivelin më të lartë që prej qershorit të vitit 2014.
I ftuar në A2 Business, Dael Dervishi, ekspert për hidrokarburet, ish-kryetar i Agjencisë Kombëtare të Burimeve natyrore, paralajmëroi se rritja e çmimit të naftës do të vazhdojë edhe më tej.
Pritet të ketë rritje të mëtejshme të çmimit të karburanteve. Sot çmimi ka shkuar 113 dollarë për fuçi. Vetëm ditën e sotme është rritur me 2 dollarë. Çmimi pritet të rritet edhe në ditët dhe javën në vijim. Kemi hyrë në një luftë të ftohtë, ku bota është ndarë më dysh. Nuk shikohet as si perspektivë që kjo luftë të mbarojë shpejt, kështu që nuk ka asnjë tregues që të thotë se ky çmim do të stabilizohet.
Më tej, ai theksoi se kompanitë duhet të kenë rezerva për 90 ditë, por sot nuk dihet pasi nuk ka një autoritet që ta bëjë këtë gjë.
