Presidenti italian Sergio Mattarella ngarkon Giuseppe Conten me detyrën e Kryeministrit për krijimin e qeverisë së re të koalicionit 5 Yje-PD.
Vendimi erdhi pas takimit Mattarella-Conte mëngjesin e sotëm. Kreu i qeverisë së re italiane do të nisë menjeherë sot konsultimet me forcat politike për krijimin e skuadrës së ekzekutivit italian.
“E pranova me rezervë detyrën e ngarkuar nga Presidenti i Republikës për formimin e qeverisë së re. Sot do të nis konsultimet me të gjitha grupet parlamentare. Në fund të konfrontimeve me ta, do ti dedikohem hartimit të programit qeverisës bashkë me forcat politike që më kanë mbështetur e i falënderoj. Jemi në fillimin e një legjislature të re evropiane e na duhet të rikuperojmë kohën e humbur për ti dhënë Italisë rolin që meriton si protagoniste.”-tha mes tjerash Conte.
Vendi duhet të përparojë shpejt. Prioriteti kryesor i qeverisë është manovra e buxhetit. Do të jetë një qeveri për të modernizuar vendin e qytetarët. Do të jetë një qeveri risie, riformimi, ringjallje shpresash që do ti ofrojë vendit siguri. Do të punojmë për të pasur një infrastrukrurë të sigurt, rrjete efikase që ushqehen me energji të rinovueshme, që integron mirëqenie ekonomike të qëndrueshme dhe do të eliminojmë pabarazitë e të gjitha llojeve ne agjendën tonë politike.
Me shumë gjasa, betimi i ekzekutivit të ri mund të bëhet në mes të javës tjetër.
