Dita e djeshme ka shënuar një rekord për sa i përket të infektuarve me Covid-19 në vendin tonë.
Në 24 orë, pas testimit të 3849 personave, janë regjistruar 1007 raste të reja.
Ndërsa në 4 spitalet COVID, po trajtohen 404 pacientë, 21 në terapi intensive nga të cilët 6 pacientë janë të intubuar.
Lidhur me këtë situatë ka reaguar edhe eksperti i shëndetit publik Erion Dasho.
Përmes një postimi në Facebook ai shprehet se kjo është këmbana e alarmit që i biem prej muajsh.
“Ndodhi pasi shteti, ministria dhe komiteti nuk bënë asgjë dhe i lanë qytetarët në mëshirën e virusit! Për situatën në spitale nuk po flet askush. Për tre ditë numri i të shtruarve u rrit nga 280 në mbi 400!
Shtretërit e pavionëve të infektivit në spitalet rajonale janë mbushur! Në spitalet private duhet të kesh mik dhe 2 apo 3 mijë euro nata që të gjesh vend! Vdekjet vazhdojnë të fshihen”, shkruan ndër të tjera Dasho.
Reagimi i plotë i Erion Dashos:
1000!
Për herë të parë dje u diagnostikuan më shumë se 1000 persona në një ditë të vetme. Kambana e alarmit që kemi muaj që i biem!
Ndodhi pasi shteti, ministria dhe komiteti nuk bënë asgjë dhe i lanë qytetarët në mëshirën e virusit! Për situatën në spitale nuk po flet askush. Për tre ditë numri i të shtruarve u rrit nga 280 në mbi 400!
Shtretërit e pavionëve të infektivit në spitalet rajonale janë mbushur! Në spitalet private duhet të kesh mik dhe 2 apo 3 mijë euro nata që të gjesh vend! Vdekjet vazhdojnë të fshihen.
Nuk raportohen vdekjet në spitalet rajonale dhe as ato në shtëpi! Vetëm kur dalin shifrat e INSTAT, kupton se sa ka mashtruar qeveria! Ndërkohë, qeveria me një plan djallëzor e ka zhvendosur vëmendjen drejt vaksinës.
Çdo muaj kontrabandon nga një kuti kartoni, të cilën kush-e-di sa e paguan në kush-e-di cilin treg të zi, dhe pret me shpresë nga BE dhe COVAX.
Fatmirësisht, ashtu si shkruaja javën e shkuar, COVAX do të dërgojë shumë shpejt disa dhjetëra mijëra doza të vaksinës së Astra Zeneca-s, të cilat me shumë gjasa do të përfundojnë në show-n elektoral të Air Albania-s!
Janë zhdukur nga ekranet kompetentët që parashikuan “pikun” në dhjetor!
Janë zhdukur promovuesit e teorisë së imunitetit të tufës, të cilët harruan se kemi të bëjmë me një virus akoma të panjohur dhe se Tirana nuk është e gjithë Shqipëria.
Stina e virozave është në kulmin e saj dhe virusi mund të bëjë shumë më tepër dëme se sa ka bërë deri tani!
Është koha për përgjegjshmëri dhe veprim të shpejtë!
