“COVID i zgjatur” mund t’u kushtojë vendeve të OECD deri në rreth 116 miliardë euro në vit gjatë dekadës së ardhshme, duke u bërë një barrë e rëndë për ekonomitë dhe sistemet shëndetësore. Sëmundja, që prek persona që kanë kaluar COVID-19 dhe vijojnë të kenë simptoma për muaj apo vite, vazhdon të ndikojë në tregun e punës dhe produktivitetin, ndërsa miliona njerëz mbeten të prekur.
Raporti thekson se kjo kosto është e krahasueshme me buxhetet vjetore të shëndetësisë të vendeve si Spanja apo Holanda, duke treguar përmasat e ndikimit ekonomik. Në kulmin e pandemisë, rreth 5.3% e popullsisë në vendet e OECD, ose rreth 75 milionë persona, vuajtën nga long COVID, ndërsa kostot shëndetësore arritën në dhjetëra miliarda euro.
Edhe pse rastet dhe kostot direkte kanë rënë krahasuar me periudhën më të rëndë të pandemisë, shpenzimet për trajtimin e kësaj gjendjeje pritet të mbeten rreth 9.4 miliardë euro në vit deri në vitin 2035. Ndërkohë, ndikimi më i madh ekonomik lidhet me humbjen e produktivitetit dhe largimin e punonjësve nga tregu i punës, çka mund të ulë rritjen ekonomike në vitet në vijim.
Ekspertët paralajmërojnë se, pavarësisht përfundimit të pandemisë, long COVID mbetet një sfidë afatgjatë që kërkon më shumë vëmendje politike dhe financiare, pasi menaxhimi i tij është thelbësor si për shëndetin e pacientëve, ashtu edhe për qëndrueshmërinë ekonomike dhe përgatitjen ndaj krizave të ardhshme shëndetësore.
