Ministri serb i Punëve të Jashtme, Ivica Daçiq, në një intervistë për gazetën serbe Novosti, ka thënë se Bill Clinton dhe Madeleine Albright konsiderohen si dy armiqtë më të mëdhenj të Serbisë. Ai e ka thënë këtë për shkak të bombardimit që NATO ia bëri Serbisë në vitin 1999.
Ai ka thënë se Clinton dhe Albright kanë janë sjellë keq me serbët gjatë vitit 1999. Thotë se ata dy kanë zgjedhur Serbinë ta kenë armik. “Se si janë sjellë me popullin tonë demokratët në erën e dinastisë Clinton e kemi ndjerë shumë mirë në lëkurën tonë më 1999. Ata e kanë zgjedhur për armik Serbinë dhe jo ne”, ka thënë Dacic për Novosti.
Daçiq madje ka shtuar se është qesharake që shqiptarët të mbështesin aq shumë Hillary Clinton, ndërsa kur serbët provojnë të organizohen për mbështetje ndaj Trump, konsiderohet si ndërhyrje në punët e Amerikës.
“Kur shqiptarët e mbështesin në mënyrë të organizuar Hillary Clintonin dhe kur me emrin e saj i pagëzojnë madje edhe butikët, atëherë ky është qëndrim legjitim, ndërsa kur unë e përmendi si ide mundësinë që serbët të mbështesin në mënyrë të organizuar Trumpin atëherë kjo konsiderohet si ndërhyrje në punët e brendshme të Amerikës. Vërtet qesharake”, ka deklaruar ai.
