Në një artikull të fundit në “Daily Express”, Unzela Khan thekson se përballë rritjes së kostove të pushimeve verore, turistët janë në kërkim të destinacioneve që ofrojnë eksperienca të paharrueshme pa rënduar shumë buxhetin.
Shqipëria është përmendur si një nga vendet më tërheqëse dhe të përballueshme në Evropë. Jason Higgs, një ekspert udhëtimesh, ka përpiluar një listë të vendeve të fshehura dhe të pasura në përvojë, dhe Shqipëria kryeson këtë listë.
Ky vend ballkanik është i njohur për bukuritë e tij natyrore dhe trashëgiminë kulturore dhe ofron mundësi për pushime të jashtëzakonshme me kosto të ulët.
Sipas Higgs, Shqipëria ka një kosto mesatare ditore prej vetëm 27 euro, përfshirë akomodimin, transportin dhe ushqimin, çmim që është dukshëm më i ulët krahasuar me shumicën e destinacioneve evropiane.
Shqipëria ofron përvoja të pasura dhe autentike, nga qyteti historik i Beratit me arkitekturën e tij të lashtë deri në Rivierën shqiptare me plazhet e saj të bukura. Ushqimet e shijshme mesdhetare, si mishi i qengjit, djathi dhe ushqimet e detit, janë gjithashtu shumë të përballueshme.
Higgs thekson se disa nga përvojat më të paharrueshme mund të gjenden në qoshet më pak të eksploruara të botës, dhe Shqipëria është një shembull i shkëlqyer i një destinacioni që ofron kursime të mëdha dhe një zhytje autentike në kulturë dhe bukuri natyrore.
