Në fshatin Llaushë të Skënderajt, aty ku për herë të parë doli publikisht Ushtria Çlirimtare e Kosovës, u përurua këtë 28 nëntor memoriali me logon e UÇK-së.
Me ngjyrën e artë, ai mban mbishkrimin “Dalja e parë publike e UÇK-së”. 27 vite më parë, në varrimin e mësuesit Halit Geci, i cili u vra nga forcat serbe, u lexua deklarata e UÇK-së nga Rexhep Selimi, i cili në krah kishte edhe dy ushtarët e tjerë, Daut Haradinaj dhe Mujë Krasniqi.
Në ceremoninë e përurimit të memorialit e organizuar nga komuna e Skenderajt morën pjesë qindra qytetarë, ish-ushtarë të UÇK-së, familje të dëshmoreve, veteranë e invalid të luftës së fundit në Kosovë, por edhe figura të tjera politike. Nismëtari i iniciativës dhe njëkohësisht ish-nxënësi i Halit Gecit, Arbër Geci ofroi detaje mbi historikun e asaj dite.
Pas shumë diskutimesh e idesh se nga do të sulmohen forcat serbe, të gjithë në krye me komandantin Adem Jasharin vendosën të zënë pozicionin në Llaushë e Rezallë të Re. “Pas shumë diskutimesh e idesh se nga do të sulmohen forcat serbe, të gjithë në krye me komandantin Adem Jasharin vendosën të zënë pozicionin në mes të maleve të Llaushës dhe Rezallës së Re. Si pozitë më e përshtatshme për të pritur forcat serbe të cilat mendohej se do të vinin nga qyteti i Skenderajt. Andaj siç pajtohen rreth orës 04:00 të mëngjesit, plotë 22 ushtarë të UÇK-së të gjithë të armatosur me vullnet të hekurt e ideale të qartë pozicionohen në katër pika të maleve përreth Llaushës dhe Rezallës së Re. Trimat e UÇK-së siç edhe ishin dakorduar një natë me herët më të hyrë komvojë në mes pozicioneve të tyre fillojnë gjuajtjet e forcave nga të gjitha anët. Përreth dy orë luftimesh, forcat serbe me ndihmë edhe të helikopterit arrijnë të tërhiqen mbrapa. Forcat serbe gjuajnë me armën të dy anët e rrugës në Llaushë duke mos kursyer as shkollën. Me ç’rast mbesin të plagosua mësuesit Halit Geci dhe Shaban Rreci”.
Mes të tjerash, Geci theksoi se ky memorial dhe shumë të tjerë duhet të trajtohen si vende të shenjta, përmes së cilave përkujtohet sakrifica e Ushtrisë Çlirimtare të Kosovës. Kryetari i Skenderajt, Fadil Nura tha se shfaqja e Ushtrisë Çlirimtare të Kosovës e cila nuk duroi padrejtësitë, vrasjet e persekutimet u bë në ditën më të rëndësishme për popullin shqiptar, 28 nëntor.
