Analisti, Ilir Demalia, e konsideron antiligjore vendimin e qeverisë për trajtim special të familjes Rasha pas vrasjes të djalit të tyre nga efektivi i policisë.
Për Ora News, Demalia thotë se në gjithë botën demokratike për raste të tilla është familja që hedh në gjyq shtetin dhe merr kompensimin për dëmin e pësuar sipas ligjit.
Ndaj dhe aktin e Ramës e cilëson një tentativë për mbyllur ngjarjen.
“Ky është akt kundër ligjit, pse kjo familje duhet të trajtohet në mënyrë të veçantë? Rasha nuk ra dëshmor i atdheut, nuk u vra në luftë dhe as aksidentalisht sepse policia nuk ishte në luftë kundër një bande dhe rastësisht u vra. Rasha u vra nga polici që përfaqëson shtetin, është fryma që ka krijuar Lleshaj në policinë e shtetit. Rama ka bërë një shkelje ligjore, pse duhet ti japë trajtim special kësaj familje? Në gjithë botën familja padit qeverinë për atë që i ka shkaktuar dhe qeveria duhet ta kompensojë përmes gjyqit sesa dëm i ka bërë. Nuk mbulon dot Rama, nuk gjykoj familjen por po të isha unë nuk do të pranoja një mëshirë të tillë nga një kryeminstër i cili me policët e tij i vrau djalin. Por duhet të vazhdojë kërkesa për drejtësinë e këtij djali, të çohet në gjyq shteti për këtë vrasje kriminale”, tha Demalia.
Nga ana tjetër ai inkurajon vijimin e protestave deri në dorëheqjen e drejtorit të përgjithshëm të policisë së shtetit, Ardi Veliu.
“Protesta duhet të vazhdojë, mundësisht jo të dhunshme, deri sa të largohet Ardi Veliu, fytyra kriminale e policisë”, deklaroi ai.
