Greqia vijon të shprehë mbështetjen ndaj kryetarit të zgjedhur të Himarës, Fredi Belerit, i cili prej 12 majit mbetet në paraburgim.
Të shumtë kanë qenë zyrtarët e lartë grekë që zhvilluar takime me Belerin në ambientet e paraburgimit, mes të cilëve edhe ambasadorja greke në Shqipëri.
Kryetari i zgjedhur i Bashkisë Himarë është vizituar pak më parë në ambientet e paraburgimit, nga deputeti grek i partisë Demokracia e Re, Angelos Syrigos. Ky i fundit pas takimit dha një prononcim për media, ku deklaroi se mbajtja e Belerit në paraburgim, do të ndikojë në integrimin europian të Shqipërisë.
Sakaq, ditën e hënë (14 gusht) do të mbërrijë në Himarë edhe Kryebashkiaku i Athinës Kostas Bakojanis, i cili do të takohet me qytetarët për të shprehur mbështetjen e tij ndaj Belerit.
Sipas mediave greke, kryebashkiaku do të marrë pjesë në tubimin që organizohet me iniciativën e organizatës “Omonia” pasditen e së hënës, në Pedonalen Qendrore të Himarës, pasi skadon afati tre mujor i parashikuar nga ligji zgjedhor për betimin e Belerit.
Kalimi i afatit do t’i mundësojë Komisionit Qendror të Zgjedhjeve të vijojë me përsëritjen e zgjedhjeve.
Beleri u arrestua më 12 maj, ndërsa hetimet ndaj tij kishin nisur më 9 maj pas referimit të rastit nga policia e Vlorës, dhe u mbështet me pamje filmike dhe përgjime pasi një agjent i infiltruar i policisë, përgjoi momentin kur bashkëpunëtorët e Belerit dhanë lekë për vota.
Në zgjedhjet e 14 majit Beleri, kandidati i koalicionit “Bashkë Fitojmë” u shpall fitues në Bashkinë Himarë përballë Jorgo Goros me një diferencë prej 19 votash.
Duke qenë në paraburgim, Beleri nuk ishte i pranishëm në mbledhjen e 27 qershorit të Këshillit Bashkiak të Himarës.
