Deputeti holandez, Geert Wilders, përmes një postimi në llogarinë e tij zyrtare në Twitter ka publikuar një fotomontazh të presidentit turk, Rexhep Erdogan, ku gjysma e portretit të tij është si e një pjesëtari të ISIS-it.
Wilders, i cili është kryetar i Partisë për Liri dhe udhëheqës i grupit parlamentar të kësaj partie në Dhomën e Përfaqësuesve, fotomontazhit ia bashkëngjiti mbishkrimin “Terrorist”, shkruan Gazeta Express.
Ky deputet njihet për qëndrimet e tij kundërthënëse dhe ka bërë thirrje që të ndalohet ai që e ka cilësuar si “islamizim i Holandës”. Më parë, Wilders e ka krahasuar librin e shenjtë të myslimanëve, Kuranin, me librin e nazistit famëkeq gjerman, Adolf Hitler, “Mein Kampf”, dhe ka bërë thirrje që Kurani të ndalohet në Holandë.
Terrorist. pic.twitter.com/ZL8ZD519aW
— Geert Wilders (@geertwilderspvv) February 15, 2021
Për më tepër, ai ka bërë thirrje që t’i jepet fund imigrimit të shtetasve nga vendet myslimane në Holandë dhe e përkrah ndalimin e ndërtimit të xhamive të reja.
Ndaj këtij postimi kanë reaguar autoritetet në Turqi. Prokurorët turq të martën i filluan hetimet kundër deputetit të së djathtës ekstreme.
