Mediat izraelite kanë publikuar një dëshmi të re mbi abuzimet seksuale ndaj pengjeve izraelite gjatë mbajtjes së tyre në Rripin e Gazës. Viktima, Guy Gilboa-Dilal, ka rrëfyer për Channel 12 se është përdhunuar nga një roje i Hamasit, ndërsa ka qenë në robëri për 739 ditë.
Sipas dëshmisë së tij, abuzimi ndodhi pas një momenti kur atij iu lejua të bënte dush. “Pasi mbarova, ai më tërhoqi dhe nuk më la të vishja rrobat. Më çoi përsëri në dhomën e tyre dhe më hodhi në një nga kolltukët”, deklaroi Gilboa-Dilal, i cili u rrëmbye gjatë sulmit të 7 tetorit në festivalin e muzikës Nova. Ai shtoi se rojtari e kërcënoi me armë dhe thikë për ta detyruar të mos tregonte askënd për ngjarjen. Gilboa-Dilal u lirua më 12 tetor, si pjesë e një marrëveshjeje të ndërmjetësuar për lirimin e disa pengjeve.
Dëshmitë e tjera të pengjeve të liruara
Gilboa-Dilal është pengu i tretë mashkull që raporton abuzim seksual gjatë robërisë. Më herët, edhe Rom Braslavsky dhe Keith Siegel kishin deklaruar se ishin abuzuar seksualisht gjatë mbajtjes nga grupet e armatosura palestineze.
Braslavsky kishte treguar se ishte zhveshur dhe lidhur për orë të tëra në kushte çnjerëzore. Ai përshkroi situatën si përpjekje të qëllimshme për ta poshtëruar dhe për t’i hequr dinjitetin. Pala palestineze nuk ka dhënë ende asnjë reagim zyrtar për këto pretendime, të cilat janë objekt i hetimeve ndërkombëtare për trajtimin e pengjeve gjatë konfliktit.
