Tirana u trondit nga një ngjarje e rëndë këtë të hënë, ku një 14-vjeçar humbi jetën pasi u godit me thikë. Një grua, dëshmitare okulare e ngjarjes u shpreh se pa njërin prej të rinjve të shtrirë në tokë duke theksuar se nuk ndërhyri askush. E moshuara tha se i mituri u transportua në spital me një makinë të kuqe, që ngjante si taxi, pasi ambulanca nuk u paraqit në vendin e ngjarjes.
“S’pashë gjë. Ai (i mituri) ishte shtrirë aty. Pashë vetëm një djalë aty. Tani që e pashë në televizor. Atë (të miturin) që pashë unë ishte shtrirë. Ambulanca nuk erdhi menjëherë. Erdhi një makinë e kuqe që e mori djalin. Kush do të ndërhyjë në këtë rast? Kush ndërhyn do shkojë në polici të rrijë atje. I ndihmoi një grua”, – tha dëshmitarja, e cila ka një biznes privat pranë vendit të ngjarjes.
Edhe një tjetër dëshmitare tregon se e panë ngjarjen, por nuk ndërhynë. Ajo tregon se është mjaftuar me ndërhyrjen e të tjerëve, ndërsa shprehet se nëse do të kishte një roje te dera e shkollës ngjarja do të ishte parandaluar.
“E pamë ngjarjen, por nuk ndërhymë. Ndërhynë ca të tjerë, ça do ndërhynim më? Jam e mërzitur dhe e stresuar. Po më bie të fikët për vete. Po të ishte polici te dera e shkollës nuk do kishte ndodhur ngjarja. Më vjen keq. Nuk e di çfarë të them. Po të ishte ai, po të kishte një mësuese ia kishte dhënë ndihmën e shpejtë. Ambulanca e lagjes atje ishte. Një doktor a ka atje apo s’ka doktor?”, – u shpreh dëshmitarja.
Top Channel ka publikuar edhe dëshminë e një tjetër dëshmitareje që tregon se ambulanca nuk ka ardhur menjëherë në vendin e ngjarjes. Ajo tregon se si ka kontaktuar ambulancën dhe kanë ndihmuar të miturin. Qytetarja rrëfen se shërbimi i ambulancës është përgjigjur menjëherë thirrjes së saj, por për shkak të trafikut të rënduar, së bashku me një tjetër grua e kanë nisur 14-vjeçarin drejt QSUT.
“Ambulancën e kam kontaktuar unë në kohë rekord që ngjarja ndodhi, ambulanca u përgjigj dhe u tregua shumë e gatshme, si pasojë e trafikut nuk mund të prisnim sepse fëmija ishte në gjendje të rëndë, por reagonte, e morëm me makinë, një zonjë me makinë të kuqe, dhe unë po e shoqëroja para duke i hapur rrugën.
Ambulanca ka telefonuar gjithë kohës “ku je, ku jeni” si përfundim na ka dalë afër QSUT sepse u drejtuam për te urgjenca aty pasi e kishim më afër. Një ambulancë nga QSUT ka ardhur dhe ka marrë djalin në kryqëzim te Hoxha Tasimit, tek bar Oslo pak më afër spitalit QSUT.
Djali ishte i gjallë deri në atë moment, jam drejtuar në spitalin ushtarak pas ambulancës dhe më thanë është në operacion. Aty takova dhe familjarët, por fatkeqësisht Martini nuk ia doli. Ngushëllime familjarëve”, – shkruan komentuesja.
