Armando Broja ka dhënë një premtim për tifozët e Evertonit, teksa ka folur për EvertonTV pas barazimit 1-1 kundër Arsenalit.
“Jam 100 për qind i sigurt që më e mira nga unë ende nuk ka ardhur”, tha bomberi kuqezi teksa skuadra nga Liverpool përgatitet për fazën përfundimtare të sezonit 2024/25.
Një dëmtim në kyçin e këmbës gjatë ndeshjes së FA Cup ndaj Peterborough në janar e mbajti Brojën jashtë fushave për 10 ndeshje.
Tani i rikthyer në formë dhe pa dhimbje, 23-vjeçari shqiptar ka luajtur si zëvendësues në tre ndeshjet e fundit të Evertonit dhe gjithashtu mori minuta të vlefshme me Shqipërinë në dy ndeshje, përfshirë fitoren 3-0 ndaj Andorrës, ku edhe asistoi Rei Manajn në golin e dytë.
“Ndjehem shumë më mirë tani. Jam i lumtur që mund të kthehem në fushë dhe të luaj pa dhimbje. Kjo ishte gjithçka që doja – të luaj pa dhimbje, të shijoj futbollin, të luaj para tifozëve dhe të bëj më të mirën për skuadrën. Golat do të vijnë, asistet do të vijnë, dhe do të luaj më mirë. Më e rëndësishmja është që jam rikthyer dhe tani dua të harroj dëmtimet dhe të ec përpara”, është shprehur Broja.
Sulmuesi kuqezi e sheh këtë periudhë të fundit të sezonit si moment vendimtar për të lënë gjurmë te klubi i Everton.
“Kurdo që del në fushë, është një mundësi për të treguar veten para trajnerit, para tifozëve dhe klubit. Dua të jap gjithçka çdo herë që zbres në fushë”, deklaroi ai.
Evertoni tani përgatitet për ndeshjen e fundjavës në transfertë ndaj Nottingham Forest, ndjekur nga një sfidë në shtëpi ndaj kampionëve në fuqi, Manchester City. Por pas dy barazimeve të forta kundër Liverpool dhe Arsenal, Broja thotë se skuadra ka vetëbesim.
“Luajtëm mirë në të dyja ndeshjet dhe, nëse jam i sinqertë, mund të kishim marrë më shumë pikë. Barazimi kundër Arsenalit tregon karakterin e skuadrës. Evertoni gjithmonë ka qenë skuadër që lufton deri në fund. Është një moment historik për klubin dhe për tifozët. Është sezoni i fundit në Goodison dhe ne do të japim gjithçka për të përfunduar sa më lart në tabelë”, përfundoi Broja.
