Organizatat e gazetarëve kanë njoftuar se autoritetet në Bjellorusi kanë arrestuar rreth 70 gazetarë, të cilët kanë raportuar për mashtrime në zgjedhjet presidenciale të kësaj jave dhe zemërimin pasues të publikut.
“Që nga e enjtja, 23 gazetarë mbeten në paraburgim”, sipas ”Reporterëve pa Kufij”, që citoi Shoqatën Bjelloruse të Gazetarisë.
Sipas deklaratës, njerëzit që punonin si reporterë u arrestuan në mënyrë të rastësishme, u rrahën dhe nganjëherë u izoluan edhe për periudha të gjata.
Ka raportime për 29 raste për dhunë policore ndaj gazetarëve, me të paktën shtatë lëndime të rënda.
“Një persekutim i tillë i medias në Europë është plotësisht i papranueshëm”, tha zëvendësdrejtoresha e ”Reporterëve pa Kufij”, Catherine Monnet, në një deklaratë. /ATSH/
