Dhoma Amerikane e Tregtisë në Shqipëri (AmCham) ka shprehur shqetësimin e saj për projektligjin “Për Marrëveshjen e Paqes Fiskale”, i cili pritet të miratohet sot në seancën plenare të Kuvendit.
Sipas Dhomës Amerikane të Tregtisë, skema krijon pabarazi mes bizneseve që i përmbahen detyrimeve tatimore dhe atyre që i shmangin, duke rrezikuar konkurrencën e drejtë.
“Projektligji krijon një skemë në të cilën bizneset që kanë raportuar siç duhet fitimet e tyre gjatë viteve vendosen në një pozicion të pafavorshëm, ndërsa ato që kanë shmangur detyrimet tatimore përfitojnë.
Zbatimi i detyrueshëm i një rritjeje prej 18% të fitimit të tatueshëm nga viti i kaluar, pavarësisht sektorit apo performancës aktuale të tatimpaguesit, zëvendëson procesin e vetëdeklarimit me një formulë arbitrare që nuk pasqyron performancën aktuale financiare të subjektit dhe krijon një barrë të padrejtë mbi tatimpaguesit që i përmbahen detyrimeve.
Ndërkohë, bizneset me fitime të deklaruara historikisht të ulëta përfitojnë nga një bazë e ulët llogaritjeje, duke krijuar pabarazi dhe shtrembërim të tregut. Kjo praktikë dëmton ndërmarrjet që i përmbahen detyrimeve dhe serioze dhe minon parimin kushtetues të barazisë para ligjit”, thuhet në deklaratë.
AmCham paralajmëron gjithashtu se projektligji mund të legalizojë kapital me origjinë të dyshimtë, duke lehtësuar rideklarime financiare pa dokumentacion mbështetës dhe pa mekanizma kontrolli të fortë.
Ndër të tjera, nënvizon se mungesa e inspektimeve të efektshme dhe kriteret e paqarta për përfituesit e skemës mund të rrisin korrupsionin dhe të dëmtojnë besimin e biznesit dhe reputacionin ndërkombëtar të vendit.
“Ky mekanizëm, i cili nuk shoqërohet me asnjë kërkesë për të verifikuar origjinën e fondeve, krijon një rrugë të qartë për legalizimin e kapitalit me origjinë të paqartë ose potencialisht kriminale. Mungesa e një mekanizmi të fuqishëm kontrolli në përputhje me legjislacionin kundër pastrimit të parave, e kombinuar me përjashtimin e auditorëve nga përgjegjësia për mospërputhjet që rezultojnë, rrit më tej rrezikun që iniciativa të perceptohet si një formë e maskuar e amnistisë fiskale.
Projektligji kufizon ndjeshëm inspektimet tatimore mbi tatimin mbi të ardhurat gjatë periudhës së marrëveshjes, duke e kufizuar mbikëqyrjen vetëm në “rishikimin e tavolinës”. Kjo dobëson aftësinë e administratës tatimore për të zbuluar evazionin dhe krijon një mjedis të favorshëm për abuzim. Projektligji nuk ofron kritere të qarta dhe objektive për përzgjedhjen e tatimpaguesve që mund të përfitojnë nga marrëveshja e paqes fiskale”, vijon Dhoma Amerikane e Tregtisë në deklaratë.
Dhoma Amerikane e Tregtisë bën thirrje për një shqyrtim të plotë të projektligjit, duke kërkuar politika fiskale që promovojnë formalizimin, konkurrencën e ndershme dhe integritetin e administratës tatimore.
Sipas AmCham, projektligji minon disa parime thelbësore të ligjit tatimor dhe standardeve kushtetuese, duke përfshirë: parimin e barazisë para ligjit; sigurinë ligjore; proporcionalitetin e detyrimeve tatimore dhe detyrimin e administratës për t’i trajtuar të gjithë tatimpaguesit në mënyrë të barabartë.
