Dhuna në burgjet në të gjithë Anglinë dhe Uellsin është rritur gjatë vitit të kaluar, sipas shifrave të reja të publikuara nga Ministria e Drejtësisë sot.
Statistikat e fundit të sigurisë në paraburgim tregojnë një rritje prej 9 për qind të sulmeve të përgjithshme në 12 muaj deri në mars 2025, me 30 mijë e 846 incidente të regjistruara – ekuivalenti i 356 sulmeve për një mijë të burgosur.
Megjithatë, të dhënat më të fundit tremujore sugjerojnë se shkalla e sulmeve është stabilizuar.
Sulmet ndaj stafit të burgjeve gjithashtu u rritën, me shtatë për qind gjatë vitit, me 10.568 incidente – 122 për një mijë të burgosur. Pavarësisht rritjes vjetore, sulmet e stafit ranë me dy pikë pesë për qind në tremujorin e fundit, raporton Anadollu, përcjell KosovaPress.
Sulmet serioze në burgje u rritën gjashtë për qind nga viti në vit në 3 mijë e 402 incidente, ose 39 për një mijë të burgosur. Numri përfshin një rritje prej tetë për qind të dhunës serioze midis të burgosurve, megjithëse sulmet serioze ndaj stafit ranë me dy për qind.
Numri i vrasjeve në burgje gjithashtu u rrit ndjeshëm, me shtatë të regjistruara në 12 muajt deri në qershor 2025 – nga asnjë një vit më parë.
