“Tema e Maqedonisë nuk zbehet dhe ka qenë pjesë e jetës sonë për më shumë se dy shekuj. Kështu tha historiani bullgar Angel Dimitrov në prezantimin e librit të tij “Bullgaria dhe Republika e Maqedonisë së Veriut. Një takim midis historisë dhe politikës”.
Në këtë aktivitet morën pjesë edhe zëvendësministri i Punëve të Jashtme të Bullgarisë, si dhe dy ish-kryeministra bullgarë.
Dimitrov theksoi se ideja për librin e ka origjinën në vitin 2021. Ai e përkufizoi punën e tij si një analizë e modernitetit dhe theksoi se libri trajton çështje me rëndësi të madhe si për të ardhmen ashtu edhe për marrëdhëniet e mira fqinjësore mes dy vendeve.
“Republika e Maqedonisë së Veriut nuk mund t’i shpëtojë orbitës jugosllave në të cilën u krijua. Është e vështirë të dalësh nga kjo trashëgimi dhe kjo vlen edhe për klasën politike”, tha historiani bullgar, raportojnë mediat bullgare.
Dimitrov është edhe bashkëkryetar i pjesës bullgare të Komisionit të përzier për çështje historike dhe arsimore me Maqedoninë, të cilin e kryeson në kuadër të Marrëveshjes për fqinjësi të mirë ndërmjet dy vendeve.
