“50 mijë ishin turistë të huaj vizituan Divjakën këtë vit”, deklaroi ministrja e Turizmit dhe Mjedisit, Mirela Kumbaro.
Ministrja Kumbaro bashkë me stafin e Administrata Rajonale e Zonave të Mbrojtura Fier ishin në Divjakë për të parë mundësi të reja për rritjen e aktivitetit në këtë zonë, gjithmonë miqësor me natyrën dhe me gjallesat që banojnë në të.
“Një qendër vizitorësh informuese dhe edukuese mbi të gjitha për fëmijët që duhet të mësojnë që të vegjël të duan natyrën dhe kafshët Parku Natyror Divjakë-Karavasta është shtëpia e shumë specieve që e popullojnë gjatë gjithë vitit, ndërsa së bashku me zonën e plazhit Divjaka arrin në 500,000 vizitorë, ku për vitin që po mbyllet 50 mijë ishin turistë të huaj”, thekson Kumbaro.
Parku Kombëtar Divjakë-Karavasta është një nga destinacionet më të preferuara për argëtim, qetësi dhe pushim gjatë fundjavës për qindra qytetarë që e frekuentojnë në çdo stinë.
Përveç natyrës, parku kombëtar u ofron qytetarëve edhe “shoqërinë” e specieve të rralla dhe të veçanta që ndodhen në këtë park si pelikani kaçurrel, apo edhe gjitari globalisht i kërcënuar – lundërza (Lutra lutra), çakalli, dhelpra, baldosa, dallëndyshja e detit, por edhe disa lloje të rralla pishash.
Në Parkun Kombëtar Divjakë-Karavasta gjenden edhe delta lumenjsh, laguna, duna ranore dhe bimësi e rrallë, çka e bën këtë park një ndër më të rëndësishmit në Mesdhe./ATSH/
