4 gola, rasate pafund dhe shumë spektakël. Napoli-Milan rezultoi një sfidë fantastike, një ndeshje që kishte si protagonist kryesor Oliver Giroud, por “bomberi” francez i vetëm nuk mjaftoi, me “djallin” që del vetëm me një pikë nga “Maradona” pavarësisht se kaluan në avantazh të dyfishtë gjatë pjesës së parë. Kuqezinjtë shpërdorojnë një shans të artë për të mbajtur hapin e Interit kryesues, ndërsa Napoli e sheh veten 7 pikë larg vendit të parë. Ekipi i Piolit ishte “zjarr” në fraksionin e parë, gjetën dy herë rrugën e rrjetës me dy aksione thuajse identike.
Në minutën e 22-të, Pulisic gjeti të vetëm në zonë Giroud. me këtë të fundit që me kokë dërgoi topin në rrjetë. Kuqezinjtë përsëritën vetën në minutën e 31-të, këtë herë ishte Calabria që krosi në zonë, aty ku Giroud fitoi duelin me Rrahmanin dhe sërish me kohë mposhti Meret duke dyfishuar shifrat. Në pjesën e dytë, Napoli u zgjua duke u rikthyer në loje me një super gola të Politano-s. Kampionët në fuqi nuk u mjaftuan me kaq dhe në minutën e 63-të, Raspadori nga goditja e dënimit realizoi një gol shumë të bukur duke barazuar shifrat në 2-2. Napoli mbeti me 10-të lojtarë pas minutës së 89-të, teksa Natan u ndëshkua me kartonin e dytë të verdhë, por në fund Kvara kishte në këmbë goditjen trepikëshe, por Maignan e ndali duke bërë që dy ekipet të ndajnë nga një pikë pas barazimit 2-2. Kjo pikë i rri ngushtë Milanit pasi kjo ishte një javë jo e lehtë, atmosfera nuk duket shumë pozitive, ku Giroud dhe Leoa i kërkuan shpjegime trajnerit për zëvendësimet:
“Gabimi ynë ishte që i lejuam golin e parë një rivali që e kishim në kontroll. Për atë që dhamë në fushë dy gola më duken shumë pak, të vjen keq të dalësh me një pikë pas një paraqitje të tillë”, u shpreh Pioli duke komentuar më pas edhe reagimet e Giroud dhe Leao: “Bëra ato zëvendësime pasi na duheshin forca të freskëta. I pashë pak të lodhur, ndryshova pasi dëshiroja të fitoja ndeshjen. Leao kërkoi shpjegimi dhe unë do t’ia jap ashtu siç duhet”, theksoi Pioli.
