Kosova
Djathtistët serbë në Dumën ruse, kundër pavarësisë së Kosovës
Dy deputetëve nga Serbia, janë paraqitur në Dumën ruse duke mbajtur në duart e tyre një flamur me mbishkrimin “Nuk ka dorëzim”.
Ata në këtë mënyrë u kanë përcjellë mesazhin zyrtarëve rusë në Moskë, më 16 mars, se kundërshtojnë propozimin evropian për normalizimin e marrëdhënieve ndërmjet Serbisë dhe Kosovës.
Propozimi evropian do të jetë pika kryesore në agjendën e takimit të ardhshëm mes presidentit të Serbisë, Alleksandar Vuçiq, dhe kryeministrit të Kosovës, Albin Kurti, në Ohër, gjatë të cilit zyrtarët perëndimorë presin përparim në marrëdhëniet ndërmjet dy vendeve.
Propozimi, megjithatë, teston mundësitë e brendshme për Aleksandar Vuçiqin, i cili po përballet me protesta e djathtistëve.
Dy deputetët, të cilët përcollën qëndrimin e tyre tek zyrtarët rusë në Moskë, i përkasin lëvizjes së djathtë Dveri.
Dveri është pjesë e bllokut të opsioneve të djathta në Parlamentin e Serbisë – koalicioni i Nada (Shpresa) dhe Zavetnici (Të betuarit) – i cili paralajmëroi protestë në Beograd, për 17 mars.
Kërkesa kryesore në këtë protestë do të jetë refuzimi i propozimit evropian për Kosovën.
Ky propozim për zgjidhjen e kontestit të gjatë me Kosovën, pavarësinë e së cilës Serbia refuzon ta njohë, u pranua në fund të shkurtit nga Vuçiq dhe Kurti.
Protesta e forcave të djathta është paralajmëruar të mbahet një ditë para takimit të ri ndërmjet presidentit të Serbisë dhe kryeministrit të Kosovës, në Ohër të Maqedonisë së Veriut.
Çfarë i thanë në Moskë deputetët nga Dveri?
Më 16 mars, siç thuhet në faqen e internetit të Dveri, deputetët e kësaj lëvizjeje, Ivan Kostiq dhe Borko Pushkiq, në një bisedë me deputetët e Dumës ruse, shprehën mendimin se propozimi evropian është “shkatërrues për Serbinë”.
Në deklaratën e lëvizjes Dveri thuhet gjithashtu se deputetët e tyre, në Moskë kanë vlerësuar se Rusia padyshim kujdeset më shumë për interesat e Serbisë sesa autoritetet serbe.
Rusia është në mesin e vendeve që nuk e njeh pavarësinë e Kosovës, si dhe bllokon anëtarësimin e vendit në organizatat ndërkombëtare.
Kjo është një nga arsyet pse autoritetet në Serbi nuk vendosën sanksione ndaj Rusisë, pas pushtimit të Ukrainës.
Ndaj pyetjes së REL-it se a kanë mbështetjen ruse për protestat që po organizojnë në Serbi, Dveri nuk ka kthyer përgjigje deri në publikimin e këtij teksti.
Dy deputetët e lëvizjes Dveri u takuan edhe me ministrin e Jashtëm rus, Sergei Lavrov, më 14 mars, në kongresin themelues të Lëvizjes ndërkombëtare të rusofilëve.
Pjesëmarrësve të atij kongresi, u ka dërguar mesazh edhe presidenti rus, Vladimir Putin.
“E vlerësojmë shumë vendosmërinë tuaj të fuqishme për të kundërshtuar fushatën rusofobike dhe për të zhvilluar dialog dhe bashkëpunim kulturor reciprokisht të dobishëm”, tha Putin.
Lëvizja ndërkombëtare e rusofilëve është paralajmëruar si një tubim i miqve të Rusisë dhe atyre që e duan historinë dhe kulturën e saj, kundër “fushatës së ashpër anti-ruse të Perëndimit”.
Lëvizja u formua në kohën kur Rusia gjendet nën izolimin ndërkombëtar për shkak të agresionit të saj kundër Ukrainës fqinje dhe po përballet me akuza për krime lufte në atë vend.
Zavetnici kërkoi përfshirjen e Rusisë në bisedimet për Kosovën
Dveri nuk është i vetmi opsion parlamentar i krahut të djathtë, i cili në Moskë sheh bashkëbisedues për politikën e saj ndaj Kosovës.
Në shkurt të vitit 2022, në Moskë, kryetarja e Zavetnici (Të betuarit), Millica Gjurgjeviq – Stamenkovski, deputetëve të Dumës ruse dhe përfaqësuesve të Ministrisë së Punëve të Jashtme u paraqiti propozimin që Rusia t’i bashkohet negociatave ndërmjet Kosovës dhe Serbisë.
Mediat raportuan se ajo ishte në Moskë pak para agresionit rus kundër Ukrainës, si kandidate në zgjedhjet presidenciale në Serbi.
Në ato zgjedhje të mbajtura në prill të vitit 2022, Aleksandar Vuçiq fitoi mandatin e dytë presidencial.
Një delegacion i Zavetnici qëndroi në Moskë edhe në dhjetor të vitit 2022.
REL-i ka kontaktuar me Millica Gjurgjeviq – Stamenkovskin, kryetaren e partisë Zavetnici, me pyetjen se a kanë mbështetjen e Rusisë për protestat kundër propozimit evropian për Kosovën.
“Sigurisht, nëse Putini nuk arrin të vijë në tubim, ai do të delegojë Lavrovin të flasë në vend të tij”, u përgjigj ajo përmes një mesazhi telefonik.
Ajo nuk iu përgjigj kërkesës për të saktësuar nëse kjo do të thotë se ata kanë mbështetjen e Rusisë për protestat.
Beshiri: Moskës i konvenon status quo-ja në marrëdhëniet mes Serbisë dhe Kosovës
Naim Leo Beshiri, drejtor i Institutit joqeveritar për Çështje Evropiane në Beograd, i tha Radios Evropa e Lirë se Moska dëshiron të ekzistojë një faktor destabilizues në rajon.
“Moska është e bindur se nëse do të humbiste çështjen e Kosovës, e më pas edhe çështjen e Republikës Sërpska, [lideri i serbëve në Bosnjë e Hercegovinë, Millorad] Dodikut dhe Bosnjë e Hercegovinës, do të humbiste plotësisht çdo ndikim në Ballkan”, tha Beshiri.
Ai shtoi se kjo do ta izolonte plotësisht Rusinë, pas agresionit kundër Ukrainës.
Millorad Dodik, kryetar i Republikës Sërpska, një nga entitetet e Bosnjë e Hercegovinës, u takua dy herë me presidentin rus, Vladimir Putin, që nga fillimi i agresionit rus kundër Ukrainës.
Naim Leo Beshiri nga Instituti për Çështje Evropiane, tha se Rusisë i konvenon status quo-ja në marrëdhëniet ndërmjet Beogradit dhe Prishtinës.
“Që ky konflikt i ngrirë të ruhet, sipas tyre, deri te disa momente të ardhshme gjeopolitike”, shtoi Beshiri.
Që nga pushtimi rus në Ukrainë, ndërmjetësuesit evropianë dhe amerikanë në dialogun ndërmjet Kosovës dhe Serbisë kanë intensifikuar përpjekjet për të arritur një marrëveshje përfundimtare ndërmjet dy vendeve.
Ndërsa, përfaqësuesi i posaçëm i Bashkimit Evropian për dialogun ndërmjet Kosovës dhe Serbisë, Mirosllav Lajçak, paralajmëroi për mundësinë e ndikimit rus.
Më 15 mars, Lajçak deklaroi se pranimi i propozimit të BE-së për normalizimin e marrëdhënieve ndërmjet Kosovës dhe Serbisë do të zvogëlonte hapësirën që Rusia të ndërhyjë në ngjarjet në rajon dhe të krijojë kaos.
“Pas sulmit të Rusisë ndaj Ukrainës, stabilizimi i Ballkanit Perëndimor është më i rëndësishëm për BE-në se kurrë më parë”, tha Lajçak.
Ai e bëri këtë deklaratë gjatë konferencës online “Evropa dhe Rusia në frontin Ballkanik” të organizuar nga Instituti italian për Studime Politike Ndërkombëtare.
Propozimi evropian për normalizimin e marrëdhënieve ndërmjet Kosovës dhe Serbisë nuk nënkupton njohje reciproke, por obligon Serbinë që të mos e kundërshtojë anëtarësimin e Kosovës në organizatat ndërkombëtare.
Serbia nuk e njeh pavarësinë e Kosovës, duke u mbështetur, lidhur me këtë çështje, në përkrahjen e Rusisë dhe Kinës në Kombet e Bashkuara.
Kjo është një nga arsyet pse autoritetet në Serbi nuk vendosën sanksione ndaj Rusisë për agresionin e saj kundër Ukrainës.
Organizatorët e protestës bënë të ditur se përveç refuzimit të propozimit evropian për Kosovën, do të kërkojnë edhe dorëheqjen e presidentit të Serbisë, Aleksandar Vuçiq, si dhe mbajtjen e zgjedhjeve në të gjitha nivelet.
Përfaqësuesit e këtij grupi të partive e konsiderojnë propozimin evropian si ultimatum për njohjen e Kosovës.
Këto grupime të djathta kanë 34 nga 250 ulëset e deputetëve në Parlamentin e Serbisë.
Serbia është shteti i rrallë, në të cilin tubimet organizohen nga partitë dhe grupimet me orientim pro-rus.
Protestat në mbështetje të Rusisë, që kur ky shtet pushtoi Ukrainën, janë organizuar nga grupi i ekstremit të djathtë “Patrulla e Popullit”, i cili flet publikisht për lidhjet e tij me paraushtarakët rusë nga formacioni Wagner.
Disa pjesëmarrës në ato protesta mbanin simbolet e Wagner-it dhe simbole mbështetëse për pushtimin rus.
Udhëheqësi i “Patrullës Popullore”, Damjan Knezheviq, ndodhet në paraburgim që nga 16 shkurti.
Prokuroria dyshon se ai, më 15 shkurt, në protestën kundër propozimit evropian për Kosovën, para Presidencës së Serbisë u ka bërë thirrje qytetarëve për rrëzimin dhe ndryshimin e pushtetit me dhunë.
Serbia nuk e sheh si problem të djathtën ekstreme dhe ekstremizmi i djathtë nuk përmendet në strategjinë e punës së Ministrisë së Punëve të Brendshme të Serbisë për periudhën 2019-2023./REl/
Rreth 52 mijë vota më pak, apo minus pesë vende në Kuvendin e Kosovës – ky është bilanci i Lidhjes Demokratike të Kosovës (LDK), nëse krahasohen dy palë zgjedhjet parlamentare të mbajtura këtë vit.
Faktorët që ndikuan në këtë rënie të mbështetjes për LDK-në nga elektorati janë të shumtë, vlerësojnë njohësit e zhvillimeve politike.
Por, sipas tyre, kryesorët janë “qasja jo e duhur e lidershipit të partisë”, mosveprimi i partisë “sipas pritjeve të elektoratit” dhe “margjinalizimi i strukturave të vjetra”, të cilat tërheqin votuesit tradicionalë të kësaj partie.
Rezultatet preliminare të publikuara nga Komisioni Qendror i Zgjedhjeve (KQZ) tregojnë se në zgjedhjet e parakohshme parlamentare, më 28 dhjetor, për LDK-në votuan 119.201 qytetarë, apo 13.57 për qind e pjesëmarrësve në votime.
Në zgjedhjet e rregullta parlamentare të 9 shkurtit, LDK-ja mori mbështetjen e 171.357 kosovarëve, ose të 18.27 për qind të atyre që votuan atë ditë.
LDK-ja “ia mbylli dyert vetes”
Analisti Imer Mushkolaj thotë për Radion Evropa e Lirë se arsyeja kryesore pse LDK-ja ka pësuar “rënie të madhe” në zgjedhjet e 28 dhjetorit ka nisur 11 muaj më parë.
Ai rikujton qëndrimin që asokohe kishte bërë të ditur kryetari i LDK-së, Lumir Abdixhiku, se partia e tij nuk do të hynte në koalicion as me Lëvizjen Vetëvendosje (LVV), e cila kishte fituar 42 për qind të votave në shkurt, dhe as me dy partitë tjera, Partinë Demokratike të Kosovës (PDK) dhe Aleancën për Ardhmërinë e Kosovës (AAK), për një qeveri eventuale të kampit ish-opozitar asokohe.
LDK-ja refuzoi ofertën e LVV-së për partneritet në qeverisje.
“Është pikërisht qasja jo e duhur e lidershipit të partisë… Unë jam i bindur që kjo ka ndikuar jashtëzakonisht shumë te logjika se si votojnë dhe si kanë votuar votuesit e LDK-së, për shkak se për mua është e pakuptimtë që një parti, e cila ekziston për të ardhur në pushtet – sikurse çdo parti tjetër – thjeshtë ia mbyll dyert vetes”, thekson Mushkolaj.
Në zgjedhjet e parakohshme parlamentare të vitit 2021, LDK-ja kishte marrë vetëm 12.73 për qind të votave. Megjithatë, ajo shënoi përmirësim në zgjedhjet e 9 shkurtit, duke u rritur për 5 pikë përqindjeje.
Analisti Rrahman Paçarizi konsideron se kur votuesit i rikthehen një partie, ata presin edhe veprim të saj.
“Ndërkohë, veprimi i LDK-së nuk ka ndodhur fare, apo nuk ka ndodhur ashtu siç e kanë pritur ose perceptuar ata votues, të cilët kanë menduar dhe shpresuar që LDK-ja do të jetë pjesë e institucioneve”, thotë Paçarizi për Radion Evropa e Lirë.
Ai shton se LDK-ja nuk ka arritur që ta ndërtojë rrëfimin e saj pas zgjedhjeve të 9 shkurtit, të cilat u pasuan me zvarritje disamuajshe të konstituimit të Kuvendit. LVV-ja, si fituese e zgjedhjeve të 9 shkurtit, nuk arriti ta krijonte e vetme qeverinë e re, gjë që dërgoi vendin në zgjedhjet e parakohshme të fundvitit.
Megjithatë, trendi i rënies së numrit të votuesve të LDK-së, sipas Paçarizit, kishte nisur rreth pesë vjet më parë.
Ardhja e Abdixhikut në krye të partisë në vitin 2021 nënkuptoi edhe një ekip të ri njerëzish më të besueshëm të tij në strukturat drejtuese të partisë.
Përpjekjet për ripërtëritjen e partisë, thotë Paçarizi, nuk prodhuan edhe rezultat të mirë tek ruajtja e elektoratit.
“Mendoj se LDK-ja i ka lënë pas dore strukturat më të vjetra të saj, të cilat tashmë pothuajse janë margjinalizuar dhe janë struktura të fjetura. Votuesit e këtyre strukturave nuk bëhen elektorat i askujt tjetër, por refuzojnë të dalin për ta votuar LDK-në”, thekson Paçarizi.
Në linjë të njëjtë shpreh mendimin edhe Mushkolaj, i cili po ashtu e sheh margjinalizimin e disa prej njerëzve nga strukturat më të vjetra të LDK-së, si shkaktar të rënies së numrit të votuesve të kësaj partie.
“Të mos harrojmë se profili i votuesve të LDK-së janë edhe njerëzit në moshë mesatare dhe të shtyrë, të cilët gjatë viteve të tëra e kanë asociuar LDK-në me këta njerëz. Atëherë, mos pritni që të njëjtit kanë për t’ia dhënë votën LDK-së. Më e pakta që ata mund të bëjnë është që të abstenojnë nga votimi dhe të mos votojnë LDK-në”.
Ku shkuan votuesit e LDK-së?
Rënia e numrit të votuesve të LDK-së më 2021, rikthimi i një numri të tyre në zgjedhjet e 9 shkurtit dhe rënia e sërishme në zgjedhjet 28 dhjetorit, tregojnë se mjaft prej këtyre votuesve i takojnë “zonës së hirtë” të elektoratit.
Paçarizi shpjegon se ky elektorat është i papërcaktuar për ndonjë parti politike. Sipas tij, LDK-ja arriti të përfitojë një përqindje të mirë të këtij elektorati prej vitit 2021 e deri në shkurt 2025, kur u mbajtën zgjedhjet.
Por, siç thotë ai, brenda 11 muajve të fundit, LDK-ja nuk arriti që këtë elektorat ta mobilizonte në drejtim të saj.
“Pati mungesë të përpjekjes për t’i ftuar, për t’i apeluar votuesit që të hidhen në ‘zonën e hirtë’ ndërmjet partive politike. Ata janë votues të emancipuar, të cilët shohin programet e partive politike. Kjo ka qenë fatale për LDK-në, e cila është rikthyer në rezultatin e saj të vitit 2021”, thekson Paçarizi.
Ndërkaq, Mushkolaj vlerëson se një numër i madh i votuesve të papërcaktuar më 9 shkurt votuan për LDK-në. Por, gjatë 11 muajve të fundit, ata ndryshuan mendje.
“Një numër i madh i këtyre njerëzve që kanë votuar për LDK-në më 9 shkurt, janë kthyer te Lëvizja Vetëvendosje. Unë mendoj që kjo ka ndodhur për shkak se te LDK-ja nuk e panë qëndrueshmërinë dhe seriozitetin e një partie për të ardhur në pushtet, qoftë me opozitën, qoftë me partinë fituese”, shprehet ai.
E ardhmja e mundshme e LDK-së
Në mbrëmjen e 28 dhjetorit, pas shpalljes së rezultateve preliminare nga KQZ-ja, lideri i LDK-së pranoi mbi vete përgjegjësinë për rezultatin e ulët të partisë së tij në këto zgjedhje.
Ai paralajmëroi se së shpejti LDK-ja do të mbajë Kuvendin e përgjithshëm, për të adresuar hapat e mëtejmë, dhe nuk përjashtoi mundësinë e dorëheqjes së tij.
Lidhur me këtë çështje, Radio Evropa e Lirë kontaktoi zyrtarë të LDK-së, por ata nuk ishin të gatshëm të komentonin zhvillimet e mundshme brenda partisë.
Vëzhguesit e zhvillimeve politike i shohin paralajmërimet e Abdixhikut si një hap para dorëheqjes së tij. Ata besojnë se brenda LDK-së ka persona me ambicie për ta marrë drejtimin e timonit të LDK-së, por mbetet ende pikëpyetje se kush mund të jetë lideri i ardhshëm.
Mushkolaj thekson se ndryshimi eventual i kryesisë së LDK-së duhet të nënkuptojë edhe ndryshim të qasjes së deritashme të udhëheqjes së partisë.
“Nëse do të ketë qasje të ngjashme me këtë të Abdixhikut, nuk mendoj se LDK-ja mund të këndellet, dhe të jetë parti e fortë dhe serioze në garë kundrejt [Albin] Kurtit dhe Lëvizjes Vetëvendosje”, theksoi Mushkolaj.
Homogjenizimi i elektoratit të LDK-së, sipas Paçarizit, kërkon një lider, i cili duhet të ketë qasje përbashkuese të strukturave të partisë.
Por, siç vlerëson ai, pavarësisht ambicieve të disa personave për ta marrë drejtimin e LDK-së, këndellja e kësaj partie do të jetë e vështirë.
“Kur dihet që zgjedhjet e radhës me gjasë do të jenë pas katër vjetësh, atëherë vështirë se do të ketë një lider që do ta marrë me vullnet partinë dhe do të arrijë ta mbajë për katër vjet të ndezur elektoratin e LDK-së, në mënyrë që të shënojë ndonjë rezultat”, shprehet Paçarizi.
Rezultatet preliminare e nxorën LDK-në partinë e tretë në zgjedhjet e 28 dhjetorit.
Ajo parashihet t’i ketë 15 vende në Kuvend, ndryshe nga zgjedhjet e 9 shkurtit, kur i fitoi 20 sosh.
Lëvizja Vetëvendosje aktualisht ka siguruar 56 vende në Kuvend, PDK-ja 21, AAK-ja 6, ndërsa 20 vende të tjera janë të garantuara për komunitetet joshumicë./REL
Prokuroria Speciale e Kosovës ka ngritur aktakuzë ndaj 21 personave për masakrën në Reçak, kur u vranë 45 civilë më 15 janar 1999.
Ndaj O.S.,R. M., K.J., G.R., ZH.T., B.J., M.L., R.M., D.GJ., B.M., D.J., M.SH., D.A., S.V. , B.M., Z.S., M.J., G.P., D.N., Ç.A., u ngrit aktakuzë për veprën penale “krim i luftës kundër popullatës civile”.
Ata akuzohen se gjatë një operacioni të forcave policore serbe, vranë 42 civilë në Reçak të Shtimes.
Prokuroria ka propozuar që gjykimi ndaj tyre të zhvillohet në mungesë, meqë ata janë “të paarritshëm për organet e drejtësisë” të Kosovës.
Sipas aktakuzës, në periudhën 1998-1999, të akuzuarit, si pjesëtarë të ushtrisë së ish-Jugosllavisë, Brigadës “243 të Mekanizuar”, Armatës së III- të, e njohur si “Korpusi i Prishtinës”, si dhe pjesëtarë të Ministrisë së Punëve të Brendshme të Serbisë, “kanë kryer edhe trajtim çnjerëzor, shkatërrim të pasurisë, dëbim masiv dhe spastrim etnik të popullsisë civile”.
Prokuroria tha se të pandehurit e kishin rrethuar fshatin Reçak nga vendet e quajtura “Pishat”, “Gështenjat” dhe “Çesta”.
Më pas, sipas aktakuzës, ata e kishin granatuar fshatin, kishin kryer kontrolle shtëpi më shtëpi, dhe kishin ndarë burrat nga gratë dhe fëmijët, duke i detyruar që të largoheshin nga fshati, “ndërsa burrat e ndaluar i ekzekutuan”.
“Hetimet kanë vërtetuar se të pandehurit kanë ushtruar dhunë fizike ndaj civilëve, duke i rrahur me kondakë armësh, shqelma, dru, zinxhirë dhe mjete të tjera të forta”, u tha në njoftimin e Prokurorisë.
Atëbotë, si pasojë e këtij operacioni të forcave serbe, afër 20 mijë civilë të fshatrave Reçak, Topill, Petrovë, Kraisht, Mullapolc, Dremjak ishin dëbuar nga shtëpitë e tyre, tha Prokuroria.
Gjykimi në mungesë, që Prokuroria Speciale ka kërkuar për këtë rast, mundësohet në Kosovë pas ndryshimeve në Kodin e Procedurës Penale, të bëra më 2022.
Megjithatë, gjykime të tilla mund të bëhen vetëm me kushtin që prokuroria dhe gjykata t’i kenë shteruar të gjitha mjetet për të siguruar praninë e të akuzuarit.
Por, ky Kod përcakton se personat që gjykohen në mungesë kanë të drejtë për një rigjykim pa kushte, kur të arrestohen.
Dokumentimin e krimeve të kryera në Reçak e kishte bërë William Walker, i cili më 1999 kishte shërbyer si shef i Misionit Verifikues të Organizatës për Siguri dhe Bashkëpunim në Evropë (OSBE).
Pas masakrës së Reçakut, në mars të vitit 1999, NATO-ja i sulmoi caqet ushtarake policore në ish-Jugosllavi.
Pas 78-ditësh të sulmeve, bombardimet u ndëprenë më 10 qershor 1999, me miratimin e Rezolutës 1244 të Këshillit të Sigurimit të Kombeve të Bashkuara.
Ndërhyrja e NATO-s në Kosovë, kishte mundësuar edhe kthimin në shtëpitë e tyre të më shumë se 800.000 refugjatëve, personave të zhvendosur brenda dhe jashtë Kosovës.
Në luftën e zhvilluar në Kosovë më 1998/99, janë vrarë mbi 13.000 civilë dhe mijëra të tjerë janë zhdukur.
Afër 1.600 persona vazhdojnë të jenë ende të pagjetur – pjesa më e madhe e tyre shqiptarë.
Në vitet e fundit, Kosova e ka rritur numrin e aktakuzave në mungesë për krime lufte gjatë luftës së fundit.
Më herët gjatë vitit, Prokuroria Speciale ngriti aktakuzë në mungesë kundër 21 të dyshuarve për dëbimin me forcë të mbi 800.000 civilëve shqiptarë nga Kosova gjatë luftës.
Dy persona, një burrë dhe një grua, janë gjetur pa shenja jete në një vilë në Pejë, kanë konfirmuar për Radion Evropa e Lirë nga Policia dhe Prokuroria në këtë komunë.
Policia është njoftuar për rastin rreth orës 15:10, tha zëdhënësi i këtij institucioni në Pejë, Fadil Gashi.
“Rreth orës 15:10 policia është informuar se në rrugën e KFOR-it se dyshohet se dy persona në një vilë janë pa shenja jete. Policia dhe ekipi i emergjencës ka dal në vendin e ngjarjes, ku vdekja e dy personave është konstatuar nga mjeku kujdestar. Viktimat janë njëri i gjinisë mashkullore dhe tjetra e gjinisë femërore”, u shpreh ai.
Ndërkaq, zëdhënësi i Prokurorisë Themelore në Pejë, Shkodran Nikçi, tha se në vendngjarje ka dalë prokurorja për krime të rënda dhe kryeprokurori, ndërkaq trupat e pajetë do të tërhiqen nga vendi i ngjarjes për t’iu nënshtruar autopsisë, me qëllim që të përcaktohen shkaqet e vdekjes.
“Lidhur me këtë çështje janë siguruar prova në vendin e ngjarjes të cilat do të shërbejnë për veprimet e mëtejme. Janë identifikuar dëshmitarët, të cilët mund të intervistohen për të kuptuar më shumë informata rreth ngjarjes”, u shpreh ai.
Mediat lokale në Kosovë kanë raportuar se viktimat ishin në të 20-tat. Megjithatë, autoritetet ende nuk kanë ndarë me publikun detaje të tjera për këtë ngjarje.
Anthony Joshua lirohet nga spitali pas aksidentit me makinë në Nigeri
Taksa e prezervativëve dhe kujdesi më i lirë për fëmijët: Plani i Kinës për të rritur shkallën e lindjeve
Faqet e para te gazetave në UK
Në foto: Viti i Ri u prit në të gjithë botën
Starmer zotohet të ‘mposhtë rënien dhe përçarjen’ në mesazhin e Vitit të Ri
Pse viti 2026 është viti i suksesit për Keir Starmer?
George Clooney, gruaja e tij Amal dhe binjakët e tyre fituan shtetësinë franceze
Vdekje të rëndësishme 2025
Pesë tradita të Vitit të Ri që nuk i dinit
Mbretëria e Bashkuar mirëpret Vitin e Ri me festime në të gjithë vendin (video)
“Gjermania po plaket!”, Merz u drejtohet qytetarëve: 2026-a është një pikë kthese për kombin tonë
Pse duhet të merrni një portofol të ri për Vitin e Ri?
Veliaj dhe Meta urojnë Vitin e Ri 2026 nga qelia, me mesazhe shprese dhe bashkimi
Bebet e para të 2026! Dy vajza lindin në maternitetet e Tiranës
Kush ishin lajmet më të çuditshme dhe virale nga bota në vitin 2025
“Wizz Air” le në mëshirë të fatit pasagjerët e linjës Londër-Tiranë
FOTO/ Nëna me dy fëmijët humbën jetën në një zjarr tragjik në Angli
U kap me kokainë me vlerë 230 mijë euro, shqiptari: Mos më dënoni, më lejoni të kthehem në Shqipëri
Shqiptari në Britani shpëton nga deportimi pasi “partnerja nuk i flet shqip”
Rrëzohet aeroplani në Britani, alarm në aeroportin Southend në Londër
Vizitorët, tarifë për të hyrë në Britani – Shtetasit që udhëtojnë pa viza duhet të aplikojnë për autorizim
Ish-kampioni i botës në boks Anthony Joshua plagoset në një aksident automobilistik në Nigeri, dy persona humbin jetën
Bllokohet hekurudha Angli-BE/ Probleme me energjinë elektrike, pezullohen udhëtimet për mijëra pasagjerë
Hetimet për atentatin e Rinasit, burime: Autorët pasi dogjën mjetin që përdorën në krim u larguan me ambulancë
Ironia e një dosje sekrete në Harvard: Amerikanë mbroni Trashëgiminë Ilire, Shqiptarët pas ’90-s e shkatërruan …
Bashkimi me euron do të kishte mbuluar koston e NHS-së
Mijëra vetë të ekspozuar ndaj fruthit, alarm në një prej aeroporteve më të ngarkuar në botë
Këta janë 10 kandidatët më të votuar në Vetëvendosjes
Britania marrëveshje me Angolën dhe Namibinë për kthimin e emigrantëve
Emigrantët kthehen, por Shqipëria nuk i mban
-
Albania1 day ago“Wizz Air” le në mëshirë të fatit pasagjerët e linjës Londër-Tiranë
-
UK3 days agoFOTO/ Nëna me dy fëmijët humbën jetën në një zjarr tragjik në Angli
-
Albania3 days agoU kap me kokainë me vlerë 230 mijë euro, shqiptari: Mos më dënoni, më lejoni të kthehem në Shqipëri
-
Albania5 days ago
Shqiptari në Britani shpëton nga deportimi pasi “partnerja nuk i flet shqip”
-
UK5 days ago
Rrëzohet aeroplani në Britani, alarm në aeroportin Southend në Londër
-
UK1 day agoVizitorët, tarifë për të hyrë në Britani – Shtetasit që udhëtojnë pa viza duhet të aplikojnë për autorizim
-
Sports3 days agoIsh-kampioni i botës në boks Anthony Joshua plagoset në një aksident automobilistik në Nigeri, dy persona humbin jetën
-
UK2 days agoBllokohet hekurudha Angli-BE/ Probleme me energjinë elektrike, pezullohen udhëtimet për mijëra pasagjerë