Ende nuk e kanë zbuluar një politikan që t‘i ketë rezistuar premtimeve bombastike në fushatë, por amnesia që i kap në Shqipëri pasi marrin pushtetin, ka në thelb vetëkënaqësinë se vota është e sigurtë në një mënyrë a tjetër, por jo përmes premtimeve të mbajtura, llogaridhënies apo bilancit qeverisës.
Kapërcime të memories gjen plot në rubrikën e re të komunikimit që Edi Rama ka nisur me votuesit në rrjetet sociale, të quajtur “Sy m’sy”.
Ky komunikim direkt me popullin e rrjeteve sociale është një metodë e konfirmuar e politikanëve, që duan të shmangin filtrat e llogaridhënies nëpërmjet ballafaqimit me gazetarët apo kundërshtarët politikë. Por edhe kështu, kur kryeministri flet vetëm për vetëm nga zyra e tij, është e pamundur të mos dallosh diferencat e Edi Ramës në opozitë, me atë që qeveris prej 12 vitesh.
Kush i ka harruar premtimet e opozitës socialiste për uljen e çmimeve, mund t’i rigjejë në videon më poshtë. Me zë dhe figurë, atëherë Rama premtoi para shqiptarëve heqjen e taksës 20% të tvsh për ushqimet bazë, buka, veza, djathi etj.
Ishte një nga premtimet kryesore që i sollën socialistët në pushtet. Para vitit 2013, nuk dëgjohej askund për faljen e taksave për bizneset e mëdha, uljen e dividentit nga 15 në 7% për pronarët e kompanive multi-milionëshe, faljen për ndërtuesit e kullave që kishin kate pa leje, përfitimet për investitorë strategjikë etj.
Përkundrazi, flitej për uljen e çmimit të naftës, të ushqimeve bazë, për punësim dhe për tregje të lira.
Me kalimin e viteve, çmimet e ushqimeve bazë u rritën ndjeshëm. Në veçanti, dy vitet e fundit, për shkak të luftës në Ukrainë, çmimet patën një lëvizje që u ndje direkt në xhepat e qytetarëve.
I njëjti fenomen ndodhi në të gjithë botën, por meqënëse Shqipëria e bazon konsumin në mallrat e importit, qytetarët ndjenë menjëherë efektet e lëvizjes në tregjet globale.
Megjithatë, të dhënat e INSTAT bënë me dije këto ditë se çmimet e ushqimeve bazë të importuara nga jashtë kanë pësuar një ulje prej 7%.
Shkak janë bërë dy faktorë; së pari zhvlerësimi i euros që tashmë është nënçmuar në nivele rekord dhe i favorizon importuesit e ushqimeve; së dyti ulja e çmimeve ka ndodhur në të gjithë botën, pas një stabilizimi të situatës, edhe pse lufta në Ukrainë vazhdon prej dy vitesh.
Por ndryshe nga e gjithë bota, në Shqipëri, çmimet mbetën njësoj të shtrenjta. Ulja është e papërfillshme, në mos nuk ka ndodhur fare. Thjesht, importuesit po fitojnë më shumë.
Tregu në Shqipëri e reflektoi menjëherë rritjes së çmimit të mallrave të importit, por nuk reagoi kur çmimet u ulen.
Dhe çfarë bën qeveria në këtë rast? Si i përgjigjet kryeministri Edi Rama ankesave të qytetarëve?
Shikoni videon më poshtë, shkëputur nga rubrika “Sy m’sy” e Edi Ramës. Ka 12 vjet në pushtet, por thotë se s’mund të bëjë asgjë për t’i ndihmuar qytetarët. Ndryshe nga çfarë thoshte kur ishte në opozitë, tani Rama thotë se e vetmja detyrë është të rrisë pagat dhe fuqinë blerëse.
Madje për t’iu spërdredhur përgjegjësisë vënë në dyshim ankesat e qytetarëve që jetojnë çdo ditë në Shqipëri dhe merr për bazë fjalët e turistëve që qëndrojnë vetëm pak ditë në vendin tonë dhe thonë se çmimet janë të ulta.
E vërteta është që kryeministri është i ndërgjegjshëm për rritjen e çmimit të ushqimeve bazë. Në fund të fundit, të dhënat statistikore janë bërë publike nga INSTAT.
Vetëm se nuk i leverdis të pranojë se pas 12 vitesh qeverisje, tregjet e mallrave të importit janë kapura, bujqësia është e pafuqishme për të përballuar nevojat e vendit, ndërsa premtimet që e sollën në pushtet, i ka marrë era. Gjithë sa mbeten janë filmimet krahasuese, që megjithatë nuk ia kthejnë dot memorien e cunguar./Lapsi.al
