Donald Trump bëri të ditur se do t’i kërkojë gjykatëses,që po gjykon çështjen e tij të mashtrimit zgjedhor, që të tërhiqet. Ai pretendoi se “nuk ka asnjë mënyrë që unë të kem një gjykim të drejtë” nëse ajo nuk dorëhiqet.
Thirrja e tij erdhi pasi prokuroria kërkoi një urdhër gjykate që do ta kufizonte atë që të bëjë deklarata publike për çështjen që po gjykohet. Gjykatësja, Tanya Chutkan, u emërua nga ish-presidenti Barack Obama.
Trump publikoi në platformën e tij të mediave sociale, Truth Social, të dielën, duke e përshkruar rastin si “liria qesharake e fjalës, zvogëlon çështjen e zgjedhjeve të ndershme” dhe tha se ekipi i tij ligjor do të kërkonte menjëherë përjashtimin e gjyqtares.
Ai nuk jep detaje lidhur me arsyet e tij për të kërkuar dorëheqjen e saj. Gjykatësja Chutkan më parë vendosi kundër përpjekjeve të Trump për të bllokuar provat për Komitetin e Dhomës së Përfaqësuesve të 6 janarit dhe është përballur me sulme të shpeshta nga aleatët e Trump ditët e fundit.
Trump e kishte përshkruar atë dhe Departamentin e Drejtësisë si “shumë partizane dhe shumë të korruptuar”. Gjykatësja Chutkan, e cila u emërua në vitin 2014, është e vetmja gjykatëse federal në Uashington që ka dhënë dënime kundër të pandehurve në çështjet që lidhen me trazirat e 6 janarit në Kapitol, që janë më të mëdha se dënimet që kërkoi Departamenti i Drejtësisë, sipas NBC News.
Çdo gjyqtar i Shteteve të Bashkuara do të skualifikonte veten në çdo procedurë në të cilën paanshmëria e tyre mund të vihet në dyshim në mënyrë të arsyeshme, sipas Departamentit të Drejtësisë të SHBA.
Përjashtimi i gjyqtares nuk ishte e vetmja gjë që Trump tha se do të kërkonte. Ai gjithashtu dëshiron që çështja e tij të zhvendoset nga Uashingtoni.
Ai thotë se është “e pamundur për të që të ketë një gjykim të drejtë në Uashington”, të cilin ai e përshkruan si “anti-Trump”. Avokati i zotit Trump, John Lauro, tha të dielën se ish-presidenti “besonte në zemrën e tij” se ai i fitoi zgjedhjet e vitit 2020.
Duke folur për rrjetet televizive amerikane, ai tha se zoti Trump po sulmohej për ushtrimin e të drejtës së tij të Amendamentit të Parë kushtetues për lirinë e fjalës.
Në fillim të kësaj jave, zoti Trump shkroi me shkronja të mëdha: “Nëse më ndjek, unë do të vij pas teje!” në Truth Social, vetëm një ditë pasi ai u deklarua i pafajshëm për katër akuza në rastin e dyshuar të mashtrimit zgjedhor.
Dhe të njëjtën natë, prokurorët thanë se kishin frikë se zoti Trump mund të zbulonte prova konfidenciale dhe kërkuan një urdhër mbrojtës për të parandaluar “shpërndarjen ose përdorimin e pahijshëm të materialeve hetuese, duke përfshirë publikun në çështje”.
Gjykatësja Tanya Chutkan i dha afat ekipit ligjor të Trump deri në orën 17:00 me orën lokale të së hënës për t’iu përgjigjur parashtrimit. Avokatët e Trump kërkuan edhe tre ditë të tjera, por gjykatësi e refuzoi kërkesën e tyre.
Gjykatësja Chutkan, një person i vijës së ashpër në çështjet kundër atyre që akuzohen për pjesëmarrje në trazirat e Kapitolit, pritet të thërrasë avokatët nga të dyja palët në 28 gusht për të diskutuar caktimin e një date gjyqi.
Akuzat, të cilat përfshijnë konspiracion për të mashtruar SHBA-në, ngacmim të një dëshmitari dhe konspiracion kundër të drejtave të qytetarëve, rrjedhin nga veprimet e ish-presidentit në prag të zgjedhjeve të 2020, duke përfshirë edhe trazirat e 6 janarit në Kapitol.
Gjatë dy viteve të fundit, gjyqtari 61-vjeçare ka fituar reputacion për dënime të ashpra për ata që janë dënuar për pjesëmarrje në trazira. Nga 31 të pandehurit që kanë dalë para saj, gjykatësja Chutkan ka dënuar secilin prej tyre me të paktën disa kohë burg, sipas një raporti të Washington Post.
Zoti Trump tani përballet me pesë gjyqe: tre gjyqe penale që përfshijnë çështjen e dokumenteve të klasifikuara, çështjen e parave të heshtura, akuzat pë mashtrim zgjedhore, si dhe dy gjyqe civile mbi praktikat e biznesit dhe me një grua që e akuzoi atë për përdhunim. BBC
