Hetimet për dosjen e incineratorëve kanë përfunduar, madje ka dhe një datë konkrete për vendimin. Në një intervistë ekskluzive për Dojce Velen, Irena Gjoka, Kryetarja e Gjykatës së Posaçme kundër Korrupsionit e Krimit të Organizuar (GJKKO) flet për dy dosjet që vazhdojnë të jenë në rend të ditës.
“Janë dy dosje me interes të lartë publik, politik dhe mediatik. Në këtë kontekst për dosjen e incineratorëve janë hetuar dhe gjykuar me masën e sigurimit, arrest me burg, funksionarë publikë të nivelit të lartë: ish-zëvendës kryeministri Arben Ahmetaj, (në mungesë), ish-ministri i Mjedisit, Lefter Koka, ish-deputeti socialist Alqi Bllako, ish-kryebashkiakë socialistë, ish-prokurorë dhe gjyqtarë. Për dosjen në fjalë kanë përfunduar hetimi dhe shqyrtimi gjyqësor dhe më 25 shtator, trupi gjykues i GJKKO pritet të japë vendimin. Ndërsa për dosjen e sterilizimit të instrumentave kirurgjike hetimet po vazhdojnë,” tha ajo.
E pyetur nëse GJKKO-ja ka presione nga politika apo bota e krimit, Gjoka dha këtë përgjigje.
“Trupa gjyqësore e GJKKO gëzon një mbrojtje të veҫantë në sajë të veprave penale që ajo gjykon, në raport me magjistratët e juridiksionit të përgjithshëm. Përveҫ kësaj kjo trupë i nënshtrohet monitorimit të bisedave telefonike, kontrollit të llogarive bankare e të tjera duke garantuar kështu integritetin e tyre profesional dhe moral,“ shtoi ajo.
Gjatë këtij viti, GJKKO-ja ka marrë vendime për 6 ҫështje penale me 38 të pandehur për korrupsionin në nivel të lartë, ndërsa ka shpallur fajtorë dhe ka dhënë dënime për pesë prej tyre.
