Drejtoresha e Institutit të Shëndetit Publik, Albana Fico në mbledhjen e sotme të Komitetit Teknik të Ekspertëve ka ngritur alarmin se po rritet numri i moshave të reja që janë shtruar në spital.
Gjatë mbledhjes, Fico tha se deri në këto momente 77% e kapaciteteve në spitale janë të zëna.
“Situata epidemiologjike ka një tendencë në rritje të rasteve të reja. Veçanërisht në javën e fundit kemi parë një rritje të konsiderueshme të rasteve të reja.
Kohët e fundit është parë një tendencë në rritje të infektimit të moshave të reja, të shtruar edhe në spital. 77% e kapaciteteve në spital janë të zëna, ndërsa në reaminacion është 34%.
Marrja e këtyre vendimeve të vështira për autoritetet dhe qeverinë ka të bëjë me përmirësimin e situatës epidemiologjike. Sa herë kemi respektuar këto masa ne kemi shkuar përpara. Mesatarja e rasteve ditore ka shkuar në 1080, pavarësisht numrit të rritur të testimeve, kemi një rritje të moshave nga 15-34 vjeç. Shpejtësia me të cilin po përhapet infeksioni, dhe të dhënat që kemi nga ISHP na tregojnë se kemi mundësinë e qarkullimit të mutacionit të ri të Covid. Duhet të jemi të qartë se respektimi i masave, puna online, mësimi përmes internetit dhe të gjitha masat e tjera të nevojshme”, tha Fico.
Ndërkohë të njëjtin qëndrim ka mbajtur edhe drejtoresha e Spitalit Infektiv Najada Çomo, e cila tha se është rritur numri i shtrimeve të moshave të reja
“Kemi shtim të numrit të rasteve të shtruar në spitale, ku është shtuar edhe numri i shtrimeve të moshave të reja. Kemi edhe raste të rënda të moshave të reja, ndërkohë që kemi patur edhe raste fatale. Deri më tani është i përballueshëm numri i shtrimeve në spitalet tona. Ne do punojmë me çdo kusht deri në momentin që do kemi pacientin e fundit, por edhe popullata duhet të na mirëkuptojë”, tha Çomo.
