Drejtuesit qipriot u shprehën të gatshëm të takojnë sekretarin e përgjithshëm të OKB-së, Antonio Guterres, ndërkohë që diskutimet zyrtare për ribashkimin e ishullit janë bllokuar që prej vitit 2017, njoftoi sot OKB pas përfundimit të një takimi të mbajtur në Nikozi.
Qipro është ndarë në dy pjesë që prej pushtimit në vitin 1974 të pjesës së saj të veriut nga Turqia, në reagim të një grushti shteti të qipriotëve grekë, të cilët kërkonin bashkimin e ishullit me Greqinë, gjë që vazhdon të shqetësojë popullatën qiprioto-turke.
Që prej asaj kohe, Republika e Qipros ushtron autoritetin e saj vetëm në pjesën e jugut, ndërkohë që pjesa e veriut drejtohet nga Qipro e Veriut (RTCN), që nuk është njohur nga komuniteti ndërkombëtar.
Cikli i fundit i negociatave për ribashkimin e ishullit dështoi në korrik të vitit 2017.
Sot, presidenti qipriot, Nicos Anastasiades dhe Mustafa Akinci, drejtues i RTCN, janë takuar në mënyrë informale përgjatë tre orëve në godinën e OKB-së, që ndodhet në Nikozi në zonën tampon që ndan ishullin.
“Dy liderët u shprehën të gatshëm për të zhvilluar një takim trepalësh me sekretarin e përgjithshëm të OKB-së, pas Asamblesë së përgjithshme të Kombeve të Bashkuara, për planifikimin e rrugës që do të ndjekin në negociatat për paqe”, theksoi OKB në komunikatë./ATSH/
