Një dritë e pazakontë në formë spirale është vërejtur në qiellin e natës mbi lindje të Shteteve të Bashkuara, duke shkaktuar debat dhe spekulime të shumta në rrjete sociale. Pamjet dhe videot e publikuara nga dëshmitarët nga New Jersey, Pennsylvania, Connecticut dhe madje deri në Ohio, tregonin një formë të ndritshme që dukej sikur rrotullohej në qiell.
Shumë përdorues të internetit aluduan për një shenjë të vizitorëve jashtëtokësorë, ndërsa të tjerë sugjeruan se mund të bëhej fjalë për një fenomen atmosferik të rrallë.
Megjithatë, ekspertët kanë shpjegimin e tyre: drita është rezultat i një lëshimi rakete. Pikërisht në të njëjtën kohë, nga Cape Canaveral në Florida u nis raketa Vulcan Centaur e kompanisë United Launch Alliance, e cila mbante një satelit eksperimental për ushtrinë amerikane.
Po ashtu, rreth së njëjtës orë, nga Guiana Franceze u lëshua raketa Ariane 6 e Agjencisë Evropiane të Hapësirës, e cila pas një manovre në orbitë liroi karburant, duke krijuar formën spektakolare spirale të dukshme nga toka.
Fenomeni, i njohur nga astronomët si “spirali i karburantit të raketës”, ndodh kur avujt e karburantit kristalizohen në lartësi të mëdha dhe ndriçohen nga dielli, duke krijuar forma mahnitëse në qiell.
Fotot dhe videot e këtij spektakli qiellor kanë bërë xhiron e botës dhe janë raportuar gjerësisht nga mediat ndërkombëtare, duke e kthyer ngjarjen në një nga momentet më të komentuara të javës.
