Dua Lipa vijon të pushojë në jug të Shqipërisë me familjen e saj, në pritje të Sunny Hill Festival, i cili për herë të parë këtë vit do të mbahet edhe në Tiranë.
Ajo dokumenton rregullisht jetën e saj në rrjetet sociale dhe duket se po ia kalon shumë mirë në Shqipëri, me familjen dhe shoqërinë. Këtë të premte, Dua ka publikuar foto të reja në “Instagram”-in e saj ku ndiqet nga 86 milionë persona.
Dua ka postuar edhe disa video duke kënduar e kërcyer me këngët e Nexhmie Pagarushës dhe Armend Rexhepagiqit nën shoqërinë e familjarëve të saj.
Postimeve të shumta të këngëtares i ka kushtuar një artikull edhe Daily Mail, por edhe pse e ndjekin këmba-këmbës 26-vjeçaren, këtë herë kanë gabuar, duke shkruar se ajo po pushon në një vend tropikal, duke mos përmendur Shqipërinë.
