Deputetja e Kuvendit të Kosovës, Duda Balje ka reaguar pas arrestimit që hetuesit e Speciales i kanë bërë ish-zëdhënësit të Ushtrisë Çlirimtare të Kosovës, Jakup Krasniqit.
Deputetja ka shkruar se Jakup Krasniqi është vet liria, teksa ka kërkuar falje që ka votuar formimin e Speciales.
“Baca Jakup është vet LIRIA. Jam thellësisht e tmerruar me format e veprimit të sotëm ndaj Baces Jakup dhe familjes së tij! Kërkoj falje publike që atëherë e votova këtë ” gjykatë speciale”! Më vjen shumë keq, sinqerisht që votuam atë botë”, ka shkruar ajo në Facebook.
Ndryshe, hetuesit e Speciales kanë arrestuar sot Jakup Krasniqin, arrestimi ka ndodhur pas bastisjes që është bërë në shtëpinë e tij, e cila ka zgjatur rreth dhjetë orë.
