Sipas Organizatës Botërore të Shëndetit mund të duhet të paktën një vit për të përcaktuar origjinën e saktë të koronavirusit.
Duke folur në Gjenevë, një ekspert i OBSH-së tha se për viruset me origjinë nga kafshët provat treguan se lakuriqët mbahen si burim kryesor, dhe një kafshë tjetër që vepron si një pritës i ndërmjetëm.
Organizata përsëriti gjithashtu se nuk kishte parë asnjë provë, të cituar nga Presidenti amerikan Donald Trump, se virusi mund të kishte origjinën në një laborator kinez.
Shkencëtarët nuk janë të sigurt se ku filloi saktësisht shpërthimi. Provat tregojnë për një treg në qytetin kinez Wuhan, por nga 41 raste të hershme të virusit, vetëm 27 kishin një lidhje të drejtpërdrejtë me tregun, raporton korrespondenti i BBC-së në Gjenevë, Imogen Foulkes.
Virusi do të ketë kërcyer nga lakuriqët në një kafshë tjetër përpara se të ketë infektuar njerëzit, por mbetet e paqartë se cila kafshë ka qenë ndërmjetëse.
Kur virusi i frymëmarrjes në Lindjen e Mesme, ose Mers, u shfaq në vitin 2012, u desh një vit për të zbuluar origjinën prej deveve.
I pyetur javën e kaluar nëse kishte ndonjë bazë në pretendimet e SHBA se virusi doli nga një laborator, OBSH tha që pas shqyrtimit të provave nga shkencëtarë të shumtë, u sigurua se shpërthimi ishte i natyrshëm. (BBC)
