Ditën e djeshme qyteti bregdetar i Durrësit u përmbyt si pasojë e reshjeve të dendura të shiut. Mjaftuan vetëm pak minuta për të nxjerrë në pah mungesën e pastrimit të kanalizimeve në shumë zona kyçe të qytetit, ku uji arriti në nivele tepër të larta duke e bërë të pamundur për banorët të lëviznin.
Sot ministria e Mbrojtjes ka dalë me një njoftim zyrtar lidhur me situatën e krijuar, duke bërë me dije se në shumë banesa dhe ambiente publike, ka prani të lartë të ujit.
40 hektarë tokë bujqësore janë nën ujë, ndërsa janë evakuuar disa familje të cilat janë akomoduar tek Kavalishenca.
Informacion mbi situatën e krijuar nga reshjet në qarkun e Durrësit
Ka prani të ujit në një numër të konsiderueshëm banesash dhe ambientet publike.
Eshtë bërë evakuimi i disa familjeve, të cilat janë akomoduar te Kavalishenca.
Sipërfaqja e tokës bujqësore nën ujë llogaritet në rreth 40 Ha.
Ka një rritje të lehtë të niveleve të lumenjve Ishëm dhe Erzen, por pa rrezik për daljen nga shtrati.
Hidrovorët në Hamallaj dhe Porto Romano vijojnë punën me kapacitet të plotë
Në terren janë të angazhuara forca nga MZSH, Autoriteti Portual, Bordi i Kullimit, ndërmarrjet e punëve publike të bashkisë.
Në mbështetje të forcave në terren janë angazhuar 2 pompa thithëse me kapacitet të lartë dhe 3 kamionë të kalueshmërisë së lartë nga Forcat e Armatosura.
Gjatë natës kapacitetet nga FA u përforcuan edhe me 2 pompa të vogla nga batalioni i mbështetjes Poshnjë, të cilat janë duke punuar për largimin e ujit te IEPV Durrës.
Në terren janë edhe grupet e punës për të vlerësuar dhe identifikuar dëmet e shkaktuara si pasojë e përmbytjeve. Kjo nuk është një situatë e re në qytetin bregdetar dhe duket se pavarësisht eksperiencave të tjera aspak të mira me reshjet e shiut që përmbytin gjithçka në pak minuta, institucionet publike nuk e kanë marrë mundimin të gjejnë një plan që situata të tilla të shmangen.
