Presidenti i Lituanisë, Gitanas Nauseda ka bërë të ditur se dy avionë ushtarakë rusë kanë shkelur ajrore të vendit të tij mbrëmjen e 23 tetorit.
Një avion luftarak Su-30 dhe një avion Il-78 hynë rreth 700 metra brenda territorit ajror lituanez nga pjesa ruse e Kaliningradit, duke qëndruar aty për rreth 18 sekonda, sipas ushtrisë lituaneze.
“Kjo është një shkelje e hapur e ligjit ndërkombëtar dhe e integritetit territorial të Lituanisë,” deklaroi Nauseda, duke shtuar se Ministria e Jashtme e Lituanisë do të thërrasë përfaqësuesin rus për shpjegime.
Incidenti vjen pas rasteve të ngjashme muajin e kaluar, kur Estonia raportoi se tre avionë MiG-31 rusë hynë në hapësirën e saj ajrore për disa minuta më 19 shtator.
Sipas ushtrisë lituaneze, shkelja ndodhi gjatë një stërvitjeje për karburant ajror të avionit Su-30 mbi Kaliningrad, një eksklavë ruse e fortifikuar fort mes Lituanisë dhe Polonisë.
Dy avionë luftarakë spanjollë Eurofighter Typhoon, të dislokuar në rajon si pjesë e misionit të NATO-s, u dërguan për të patrulluar zonën pas incidentit.
Ky rast shton tensionet mes NATO-s dhe Rusisë, të cilat janë përshkallëzuar kohët e fundit për shkak të një serie shkeljesh të hapësirës ajrore.
Në fillim të shtatorit, Polonia rrëzoi disa dronë rusë mbi territorin e saj gjatë një sulmi masiv rus ndaj Ukrainës, ndërsa një dron tjetër shkel hapësirën ajrore të Rumanisë disa ditë më vonë.
“Këto veprime provokuese tregojnë mungesë respekti për sovranitetin e vendeve të NATO-s dhe rrezikojnë stabilitetin rajonal,” tha një zyrtar i lartë i aleancës për Reuters. Lituania, si një nga vendet balltike në vijën e parë të kontaktit me Rusinë, ka qenë veçanërisht vigjilente ndaj aktiviteteve ushtarake ruse në Kaliningrad, ku Moska ka vendosur armatime të avancuara, përfshirë raketa Iskander.
Ministria e Mbrojtjes e Lituanisë deklaroi se incidenti do të diskutohet në takimin e ardhshëm të Këshillit të NATO-s, duke kërkuar forcimin e pranisë ajrore të aleancës në rajonin e Detit Baltik.
Presidenti Nauseda përsëriti angazhimin e Lituanisë për mbrojtjen kolektive të NATO-s, duke thënë: “Ne do të mbrojmë çdo centimetër të territorit tonë dhe do të mbështetemi te aleatët tanë për të penguar çdo agresion”
