Reagime të ashpra në Gjermani pas zbulimit të aferës me maska nga dy deputetë konservatorë të Bundestagut. Dy deputetët e CDU e CSU janë larguar ndërkohë nga partia, Nikolaus Löbel ka lënë mandatin si deputet.
Dy deputetët gjermanë, Nikolaus Löbel nga CDU, dhe Georg Nüßlein nga CSU (ndërkohë të larguar nga partia) janë pasuruar personalisht përmes sigurimit të maskave në krizën e Coronës. Gjatë vitit të kaluar ata kanë marrë provizione në shuma 6 shifrore për ndërmjetësimin që kanë bërë për kontratat me prodhuesit dhe furnizuesit e maskave. Firma e Löbel ka marrë 250.000 euro honorar për ndërmjetësimin që ka bërë mes një furnizuesi maskash dhe dy sipërmarrjeve private, kurse në ndërmjetësimin që ka bërë Georg Nüslein, përmes një firme të tretë kanë mbërritur në firmën, ku ai është drejtor vetë, një shumë prej 650.000 eurosh.
