Ditën e sotme është zhvilluar një tjetër protestë për vrasjen e 14 vjeçarit Martin Cani 2 muaj më parë në Tiranë.
Ngjarja ndodhi pranë shkollës Fan Noli në kryeqytet, pas një konflikti që Cani dhe shoku i tij kishin me bashkëmoshatarë të tyre.
Në konflikt e sipër, i mituri Mario Përlleshaj dyshohet se e goditi me thikë 14-vjeçarin Cani, duke e lënë të vdekur.
Pasi kanë zhvilluar homazhe në vendin e incidentit, prindërit e Canit kanë folur për mediat, ku kanë deklaruar se institucionet nuk përgjigjen mbi ecurinë e hetimeve për vrasjen.
“Kemi dy muaj që përjetojmë këtë dramë të madhe e nuk kemi asnjë reagim nga institucionet. Iu bëj thirrje të gjithë prindërve që të bashkohemi, pasi fëmijët janë mbi gjithçka. Nuk flemë gjumë, po përjetoj një ngjarje tragjike, kemi një traumë tepër të madhe. Na ka kapur frika, iu bëj thirrjeve institucioneve që të na dëgjojnë. Heshtja vret”, tha babai i Martin Canit.
Të njëjtën gjë deklaroi edhe nëna e 14 vjeçarit të ndjerë, e cila tha se kërkon vetëm drejtësi. Ajo shtoi po ashtu se asnjë institucion nuk i ka kontaktuar mbi ecurinë e hetimeve.
“Kërkoj vetëm drejtësi. Askush nuk më ka kontaktuar. Mesazhet e mia i kam bërë publike dhe dua vetëm drejtësi”, tha e ëma e Canit.
