Dy persona kanë vdekur dhe qindra të tjerë janë evakuuar si pasojë e një vatre masive zjarri në Qipron jugore, ku janë shkatërruar shumë shtëpi dhe janë kërcënuar komunitete të tëra si pasojë e valës së madhe të të nxehtit, raporton Reuters.
Së paku 10 kilometra katrorë janë djegur rrafsh me tokë në një rajon të njohur për prodhimin e verës në veri të qytetit Limassol pasi flakët shpërthyen kah mesdita e së mërkurës, me shumë fronte zjarre aktive edhe në mëngjesin e së enjtes.
Dy persona janë gjetur të vdekur në një makinë të djegur pasi mjeti ishte përpirë nga flakët e rrëmbyeshme të zjarrit. Së paku dhjetë persona kanë pësuar lëndime, me dy prej tyre në gjendje kritike, ka bërë të ditur policia.
Me zbardhjen e ditës, një re e përflakur ka qëndruar në qiellin e Limasollit pas djegies së maleve përreth. Në terren janë nxjerrë edhe fluturake të specializuar për fikjen e zjarrit.
Autoritetet kanë thënë se ende nuk mund të japin ndonjë vlerësim për vlerën e dëmeve. Nuk dihet gjithashtu se çka e shkaktoi zjarrin masiv.
Temperatura në ishull ka shkuar në 43 shkallë Celsius të mërkurën, duke i detyruar autoritetet që të ngrehin alarmin. Edhe të enjten pritet të ketë temperatura deri në 44 shkallë Celsius – më e larta sivjet në Qipro.
