Laure Ferrari, partnerja franceze e liderit të Reform UK Nigel Farage, ka rezultuar të jetë e vetmja pronare ligjore e një shtëpie me vlerë 885 mijë £ në Essex, e blerë me para në dorë. Ky fakt ka ngritur dyshime mbi burimin e fondeve, pasi Ferrari ka pranuar më herët se kishte vështirësi financiare.
Në vitin 2017, Ferrari i kishte thënë Euractiv se kishte punuar si kamariere në Strasburg “për t’ia dalë me shpenzimet e muajit”. Në të njëjtin vit, Farage e ftoi të qëndronte në shtëpinë e tij në Londër, pasi ajo nuk kishte ku të qëndronte dhe nuk mund të paguante qira.
Blerja e pronës luksoze – me katër dhoma gjumi, pishinë të ngrohur dhe ndërtesë shtesë – ka ngritur pikëpyetje mbi financat e çiftit, veçanërisht pasi nuk figuron asnjë hipotekë e regjistruar. Në fillim Farage kishte thënë se e kishte blerë ai vetë shtëpinë, por më pas u tërhoq duke sqaruar se ishte shprehur gabimisht.
Farage ka mohuar kategorikisht se i ka dhënë Ferrari-t para për blerjen e shtëpisë, duke theksuar se ajo “vjen nga një familje shumë e suksesshme franceze dhe mund ta përballojë vetë”. Megjithatë, BBC raportoi se biznesi i transportit të babait të saj u mbyll në vitin 2020 me më shumë detyrime sesa pasuri.
Hetimi i BBC-së zbuloi gjithashtu se Ferrari, së bashku me familjen e saj, zotëron një pjesë të ish-zyrave të firmës dhe një apartament aty pranë me vlerë 302 mijë £. Ekspertët e taksave kanë thënë se nuk ka shenja të shmangies së detyrimeve tatimore, ndërsa Farage këmbëngul se gjithçka është bërë “plotësisht në përputhje me ligjin”.
Zëdhënësi i Farage deklaroi: “Laure Ferrari është pronarja e vetme ligjore dhe përfituesja e vetme e pronës. Ajo i përket vetëm Laure-s dhe është blerë me fonde që i përkasin asaj. Të gjitha taksat janë paguar siç duhet. Nigel nuk ka asnjë interes financiar në këtë pronë.”
