“Është mbresëlënëse që përfundoi kështu. E dija që në një moment Zoti do të ma jepte dhe nuk e di pse kisha një parandjenjë dhe ndjeva se do të ishte kështu. Jam jashtëzakonisht i lumtur”.
Kështu është shprehur Lionel Messi pas triumfit të tij të parë në një Kampionat Botëror, aty ku arriti të realizojë dy gola në ndeshjen e mbyllur 3-3 dhe ku Argjentina fitoi me penallti.
Ai konfirmoi se Kupa e Botës është trofeu më i rëndësishëm në të gjithë karrierën e tij të shkëlqyer. “Nuk ka asgjë që mund të krahasohet me këtë. Kupën e Amerikës dhe Kupën e Botës i fitova pothuajse në fund të karrierës sime. Por nga ana tjetër unë e dua futbollin, më pëlqen ajo që bëj. Të gjithë e duan këtë Kupë, është ëndrra e vogël e kujtdo. Unë kam qenë me fat që kam arritur gjithçka në karrierën time dhe tani po shkoj në Argjentinë për ta shijuar me njerëzit.
Messi e vlerësoi ndeshjen finale si shumë të çuditshme, ndërsa e krahasoi atë me çerekfinalen ndaj Holandës.
“Vuajtëm shumë, por ia dolëm. Mezi presim të jemi në Argjentinë për të parë se sa e çmendur do të jetë kjo”, tha sulmuesi.
Ndërkohë, nëse dikush do të kishte dyshime se Messi do të tërhiqej nga kombëtarja pas këtij suksesi, ai i ka hedhur poshtë të gjitha aludimet, duke u shprehur se do të luajë me fanelën e Argjentinës si kampion bote.
