Alternativa e ekstremit të djathtë në Gjermani (AfD) e shpalli Bashkimin Evropian një “projekt të dështuar” në formën e tij aktuale që është sot.
Ajo miratoi të dielën programin për zgjedhjet në Parlamentin Evropian të qershorit të ardhshëm në konventën e partisë në qytetin lindor të Magdeburg, njoftoi agjencia e lajmeve dpa.
Në tekst theksohet se BE-ja ka “dështuar plotësisht” në të gjitha fushat e rëndësishme, duke përfshirë politikën e saj të migracionit dhe klimës, dhe se ajo e refuzon euron si monedhë.
Megjithatë, partia e esktremit të djathtë ndaloi së kërkuari daljen e Gjermanisë nga BE. Në vend të kësaj, AfD po bën thirrje që BE të rithemelohet si një “federatë e kombeve evropiane”.
Sipas programit zgjedhor, detyrat kryesore të federatës së re duhet të jenë mbrojtja e kufijve të jashtëm kundër migracionit, autonomia strategjike në politikën e sigurisë dhe ruajtja e “identiteteve të ndryshme” në Evropë.
Sondazhet e fundit japin mbështetje për AfD nga 19 deri 22%.
Kandidatët e AfD fituan kohët e fundit zgjedhjet në Gjermaninë Lindore për të drejtuar një administratë qarku për herë të parë që nga vitet 1930. Ajo tani ka kryebashkiakun në një qytet me një popullsi prej 56,000 banorësh.
Programi i miratuar në Magdeburg të dielën merr një linjë më të butë ndaj BE-së sesa draft programi i qershorit, në të cilin AfD tha se do të kërkonte “shpërbërjen e BE-së”.
Disa zyrtarë të AfD-së kishin shprehur më parë dëshirën e tyre që Gjermania të dalë krejtësisht nga BE-ja, në atë që quhet “Dexit”.
Megjithatë, programi i ri thotë se AfD mbështet idenë e një “Evrope të atdheut, një komunitet evropian të shteteve sovrane dhe demokratike”. Bashkëkryetarja e AfD, Alice Weidel, tha se kompromisi i ri ishte arritur të dielën gjatë negociatave.
Konventa finalizoi gjithashtu listën me 35 kandidatë të AfD për zgjedhjet në Parlamentin Evropian vitin e ardhshëm. Maximilian Krah u zgjodh fundjavën e kaluar si kandidati kryesor i AfD me 65.7 për qind të votave. Krah është anëtar i Parlamentit Evropian që nga viti 2019.
Anëtarët kryesorë të AfD folën të dielën kundër bashkëpunimit me bllokun kryesor konservator të opozitës në vend, Bashkimin Kristian Demokrat të ish-kancelares, Angela Merkel.
Deklaratat e tyre janë në kontrast me thirrjet e mëparshme të kreut të AfD-së, Tino Chrupalla, i cili i kishte kërkuar CDU-së të çmontonte “firewallin” kundër partisë së tij.
Duke hapur konventën javën e kaluar, Chrupalla vuri në dukje perspektivat e partisë së tij për të fituar tre zgjedhje shtetërore në rajonet lindore vitin e ardhshëm, duke u thënë delegatëve se “ne mund të marrim përgjegjësinë e qeverisjes”.
Bashkëkryetarja e AfD, Alice Weidel, kishte bërë deklarata të ngjashme në lidhje me aspiratat e partisë për qeverisje.
Por nënkryetari i AfD, Stephan Brandner, tha për edicionin e së dielës për Frankfurter Allgemeine Zeitung se ai “nuk sheh një arsye për t’iu afruar” Unionit Kristian Demokrat, duke shtuar se partia konservatore kishte pasur mundësinë e saj për “shumë kohë”.
Brandner ka qenë anëtar i Parlamentit gjerman që nga viti 2017 dhe ishte kandidati kryesor i AfD në shtetin e Thüringen për zgjedhjet federale gjermane të 2017-ës.
Udhëheqësi kryesor i CDU-së, Friedrich Merz, këmbënguli se nuk do të kishte asnjë bashkëpunim as në nivel lokal midis Unionit të tij Kristian Demokrat dhe AfD-së, pasi sugjerimi i tij se mund të punonin së bashku nxiti kritika nga kolegët konservatorë. Apnews
