Guri u shpreh se George Bush dhe George Washingon ishin shqiptarë
Figurat e njohura në botë po zbulohen se janë shqiptarë. Kështu deklaron për dy prej tyre, ambientalisti, Sazan Guri. I ftuar ditën e sotme në emisionin “Good Morning Albanians” në “Euronews Albania”, Guri u shpreh se George Bush dhe George Washingon ishin shqiptarë. Ai tha se Bush, i ka pohuar një mikut të tij se ishte shqiptar. Po ashtu, ai shton se Washington ishte me prejardhje nga Sinica e Pejës. Guri tha se mamaja e George Washington vend emigroi në SHBA, aty ku u martua me një shtetas amerikan.
“George Washington nga Sinica e Pejës. Edhe George Bush. I tha një inxhinieri, shokut tim në Korfuz, unë jam nga Shqipëria, por nuk e di se kur kam ikur. Publikisht e ka thënë. Mamaja e George Washington, Maria shkoi fillimisht në Angli, Skoci, Irlandë dhe ishin ndër të parët që shkuan nga Irlanda kur ishte kriza e patates dhe shkuan të gjithë në Amerikë.
U martua me të shoqin amerikan dhe ka lënë porosi sesi të mbahet Kosova dhe Shqipëria. Dwight D. Eisenhower i caktoi një fond Shqipërisë, por këta nuk i morën, thonin imperializmi amerikan. Ne kemi një akademi që quhet “Rrënjët tona” dhe na vijnë fakte nga e gjithë bota, kemi njerëz që punojnë në arkiva”, theksoi Guri.
