Një krim brutal ka ndodhur në Volos të Greqisë, ku një burrë 40-vjeçar shqiptar vrau gruan e tij 36-vjeçare, e cila gjithashtu ishte shqiptare, me të cilën ka katër fëmijë dhe më pas u arratis.
Sipas mediave të huaja, krimi ndodhi në pallatin ku jeton familja në rrugën Konstanta. Sherri filloi në apartamentin e tyre dhe çifti zbriti në hyrje të pallatit ku vazhduan të ziheshin. Më pas, burri dyshohet se vrau gruan e tij me një objekt të mprehtë dhe u largua menjëherë nga vendi i krimit.
Informacioni se burri filloi sulmin vrasës ndaj gruas nga apartamenti, në sy të katër fëmijëve, është tronditës. Madje raportohet se njëri nga fëmijët i ka thënë policisë: “E pashë babin duke e therur mamin me thikë”. Plagët e gruas janë në shpinë dhe në qafë.
Autori i krimit, ndërtues me profesion, doli me vrap nga pallati dhe iku në Rrugën Gladstonos, ndërsa policia ka nisur një kërkim për ta gjetur dhe arrestuar atë. Zona është rrethuar nga forca të shumta policie, ndërsa një ambulancë dhe një mjek ligjor ndodhen në vendngjarje.
Sipas informacioneve nga protothema.gr, nuk ka pasur të dhëna për dhunë në familje, megjithatë, autori ishte përdorues droge dhe kishte tentuar vetëvrasje në qershor.
Hetimet janë në zhvillim e sipër, ndërsa autoritetet po shqyrtojnë shkaqet që çuan në vrasjen e gruas.
