Fiorentina ka ofruar 10 milionë euro për kartonin e tij, ndërkohë që Cristian Shpendi po shkëlqen në Serinë B italiane, duke shënuar 8 gola në 12 ndeshje me Cesenan.
Bomberi që është në radarin e disa klubeve elitare italiane përveç viloëve nga Firence ka dhënë së fundmi një intervistë për “Pianeta Bianconero”, ku ndër të tjera ka komentuar edhe lajmet që e çojnë atë te Kombëtarja Italiane dhe një ftesë e mundshme nga Luciano Spalleti.
Shpendi nuk e ka mohuar se e priste një ftesë nga Shqipëria dhe tekniku Sylvinho për ndeshjet e nëntorit në Ligën e Kombeve.
Ai po ashtu është shprehur se nuk do ta refuzonte, përkundrazi do ta merrte në konsideratë një telefonatë nga Italia, pavarësisht se është angazhuar me Shqipërinë U-21.
“Të them të vërtetën, mendova se do të ftohesha nga Kombëtarja shqiptare për dy ndeshjet e Ligës së Kombeve. U zhgënjeva kur e pashë që nuk isha në listë. Unë kam lindur dhe jam rritur në Itali. Një telefonatë nga Italia nuk më ka ardhur kurrë, por nëse vjen, sigurisht që do e mendoja”, tha bomberi kuqezi.
Sa i përket merkatos, ai thotë se ka lexuar lajmet që qarkullojnë për të.
“Mund t’ju siguroj se nuk di asgjë fare, janë thjesht thashetheme që nuk më shqetësojnë, mendoj për Cesenën dhe e di që të vazhdoj këtu është rruga e duhur, ndonëse nuk më takon mua të marr vendime të caktuara”, deklaroi Shpendi.
