Zjarri i rënë në komisariatin nr. 5 në Kamëz mbrëmjen e kësaj të shtune ka shkaktuar viktimën e parë.
Policia njofton se shtetasi i ndaluar A. M. ka humbur jetën ndërsa dy policë janë dërguar për ndihmë policore, njëri prej të cilëve në gjendje kritike për jetën.
Viktima është një 26-vjeçar i arrestuar për dhunë në familje.
“Më datë 26.03.2022, në Kamzë, në ambientet e Komisariatit të Policisë Nr. 5, në rrethana ende të paqarta, ka rënë zjarr dhe si pasojë janë dëmtuar dhe janë dërguar në spital për ndihmë mjekësore shtetasit e ndaluar A. M., D. I., dhe punonjësi i policisë H. B. Shtetasi A. M., ka ndërruar jetë në spital.”, njofton policia.
Flaka ka nisur në ambientet e brendshme të komisariatit të policisë dhe u shua vetëm pas ndërhyrjes së e zjarrfikësve të Kamzës.
Punonjësit e komisariatit janë evakuuar nga godina ndërsa të ndaluarit do të shpërndahen nëpër komisariate të tjera.
Deri më tani nuk dihen shkaqet e këtij zjarri por shtëllunga tymi vijojnë të dalin në vendin ku ishte vatra e flakëve.
