Bregdeti i Durrësit vijon të jetë nën pushtimin e mbeturinave, pavarësisht se kjo gjendje është denoncuar publikisht që prej më shumë se një jave.
Në Gjirin e Lalëzit, Ishëm, Hamallaj e Currila dhe në disa zona të tjera të vijës bregdetare, dallgët kanë nxjerrë sasi të mëdha mbetjesh.
Bidona plastike, qese, kanaçe e materiale të tjera industriale prej javësh qëndrojnë të shpërndara përgjatë bregut, duke krijuar një pamje të shëmtuar dhe shqetësuese për banorët dhe vizitorët. Shqetësim nuk është vetëm pamja, por edhe efektet që ka një ndotje e tillë në mjedis.
“Siç shihet edhe nga pamjet, bregu nuk është më një hapësirë natyrore, por një shtrat mbetjesh të grumbulluara që po dëmtojnë mjedisin. Pavarësisht alarmit të ngritur, pastrimi deri më tani është kryer vetëm në plazhin publik të Durrësit, ndërsa në zonat e tjera situata vijon të mbetet alarmante”, raportojnë mediat.
Pas interesimit të TV Klan se kur do të nisë pastrimi në këto zona, institucionet vendore, nën kujdesin e Bashkisë së Durrësit, njoftuan se mëngjesin e së premtes ekipet e pastrimit do të dalin në terren.
Plazhi i Durrësit nuk është i vetmi që po përballet me një situatë të tillë katastrofike. Gjendja mbetet e rëndë edhe në Divjakë, ku ndërhyrja e autoriteteve ka qenë minimale.
