Presidenca e Francës tha të hënën se përmes analizës së pavarur është arritur në përfundim se kritikuesi i Kremlinit, Alexei Navalny, është helmuar me noviçok në përpjekje për vrasje.
“Presidenti e shprehu shqetësimin e tij të thellë për aktin e kryer kundër Alexei Navalnyt dhe për nevojën që gjithçka të dalë në dritë, pa vonesë, për rrethanat dhe përgjegjësitë e këtij tentimi të vrasjes”, thuhet në deklaratën e zyrës së presidentit francez, Emmanuel Macron, pas bisedës që ai pati me homologun rus, Vladimir Putin.
Gjermania njoftoi më herët se laboratorët në Suedi dhe Francë në mënyrë të pavarur i kanë mbështetur rezultatet e dala nga laboratorët gjermanë këtë muaj, shkruan Reuters.
“Ai (Macroni) e shprehu solidaritetin e tij të plotë me Gjermaninë për hapat që duhet të merren dhe pasojat që do të dalin nga kjo situatë”, thuhet më tej në deklaratën e Presidencës së Francës.
Presidenti francez është përpjekur ta pakësojë mosbesimin mes Rusisë dhe Perëndimit, duke shpresuar që ta përdorë ndihmën ruse për zgjidhjen e krizave më të vështira të botës.
Sidoqoftë, zyrtarët francezë kanë thënë se nuk është shënuar përparim në dialogun me pesë pika që Macroni ia propozoi Putinit para më shumë se një viti.
