Dhjetëra mijëra njerëz marshuan në kryeqytetin e Bangladeshit, Daka, duke bërë thirrje për bojkotim të produkteve franceze pas qëndrimit zyrtar të shtetit evropian kundër radikalizmit.
Protestuesit e dogjën portretin e presidentit francez, Emanuel Makron, i cili e ka mbrojtur publikimin e karikaturave të profetit Muhamed.
Policia e Bangladeshit nuk i lejoi protestuesit që të arrijnë te vendi për ku ishin nisur – Ambasada e Francës, shkruan BBC, transmeton Gazeta Express.
Autoritetet thanë se rreth 40.000 persona morën pjesë në protestën e organizuar nga partia “Islami Andolan Bangladesh”, që është ndër partitë më të mëdha islamike në shtetin e Azisë Jugore.
Protestuesit u dëgjuan duke brohoritur “bojkotoni produktet franceze” dhe bënë thirrje për ndëshkimin e presidentit Macron.
“Makroni është një nga liderët e paktë që e adhuron djallin”, tha para protestuesve kryetari i partisë që e organizoi këtë protestë, Ataur Rahman. Ai bëri thirrje që qeveria ta dëbojë ambasadorin e Francës.
“Franca është armike e myslimanëve. Ata që e përfaqësojnë atë janë gjithashtu armiqtë tanë”, tha një udhëheqës tjetër i këtij grupi, Nesar Uddin.
Policia përdori tela me gjemba për të bllokuar një rrugë rreth pesë kilometra larg Ambasadës Franceze, duke ua pamundësuar protestuesve që të arrijnë deri te ndërtesa e rëndësishme diplomatike.
