Ka mbërritur në 52 numri i të vdekurve nga koronavirusi në Kosovë.
Kryetari i Komunës së Gjilanit, Lutfi Haziri, ka bërë të ditur përmes një njoftimi se sot e ka marrë lajmin për vdekjen e një qytetari të Gjilanit.
“Fatkeqësisht në përballjen me pandeminë globale Covid-19, sot nga jeta është ndarë edhe qytetari i Gjilanit, i katërti në këtë pandemi, I. M.. Nga njoftimi që kemi marrë prej Qendrës Klinike Infektive në Prishtinë, sot ishte një lajm i vështirë për të gjithë ne”, shkruan ai.
Haziri po ashtu e ka ritheksuar kërkesën për respektimin e masave.
Në Kosovë aktualisht janë 1250 raste aktive. Deri tash në vend janë regjistruar 2878 raste pozitive, me 1577 prej tyre që janë shëruar.
