Edhe diplomatja dhe politikania e njohur kosovare, Edita Tahiri, ka dalë në krah të ish-kryeministrit Sali Berisha pas vendimit të Departamentit të Shtetit për të mos lejuar hyrjen në SHBA të Berishës dhe familjes së tij.
Në një postim në facebook, Tahiri shkruan se shkëlqimi kombëtar i Sali Berishës është i paprekshëm dhe ai do të mbetet lider historik i kombit shqiptar.
“Shkëlqimi kombëtar i Sali Berishës është i paprekshëm. Ai mbetet një lider historik i kombit shqiptar sepse vuri kombin mbi të gjitha.Udhëhoqi me vizion dhe vendosmëri drejt Shqipërisë demokratike dhe Euro-atlantike dhe aleancës strategjike me Amerikën, duke bërë kthesën historike nga komunizmi në demokraci.Solli lirinë për popullin duke i dhanë fund totalitarizmit që kishte pllakosur Shqipërinë për dekada.
Por mbi të gjitha Sali Berisha mbrojti dhe avancoi interesat kombëtare duke i dhënë mbështetje gjysmës tjetër të kombit të mbetur padrejtësisht nën dominimet e huaja. Njohja e hershme e pavarësisë së Kosovës, dhe mbështetja e vazhdueshme për luftën tonë për liri e pavarësi ka qenë një shtyllë e fortë për neve udhëheqësit e pavarësisë së Kosovës. Askush nuk mund ta cenojë atdhetarinë e Sali Berishës. Nuk ka lider pa gabime, por liderët që shkruajnë historinë e kombit mbeten në faqen e ndritshme të historisë!” shkruan Tahiri.
Vendimi i Departamentit amerikan të Shtetit, erdhi vetëm pak javë nga zgjedhjet e 25 Prillit. Zoti Berisha është në listën e deputetëve të ardhshëm të kësaj partie.
Para zgjedhjeve, ambasadorja amerikane Yuri Kim, duke ju referuar rastit të ish deputetit Tom Doshi, përsëriti disa herë se personat ndaj të cilëve qeveria amerikane ka marrë vendim për të mos ju lejuar hyrjen në territorin e Shteteve të Bashkuara, nuk duhet të jenë pjesë e parlamentit. Zoti Doshi u tërhoq menjëherë pasi ai fitoi mandatin për deputet.
Mbetet për t’u parë se cili do të jetë qëndrimi i zotit Berisha në këtë rast, duke qenë se mandati i deputetit është personal.
