Kompanitë më të mëdha industriale të Rusisë, nga hekurudhat dhe automobilat te metalet dhe qymyri, po detyrohen të pezullojnë punëtorët nga puna ose të shkurtojnë stafin ndërsa ekonomia e luftës ngadalësohet. Ky trend i ri i shkurtimeve të kostos së punës thekson presionin në rritje mbi sektorët jo-ushtarakë të Rusisë, ndërsa kërkesa e brendshme ngec dhe eksportet tkurren për shkak të sanksioneve perëndimore.
Sipas të dhënave, sektorët e ekonomisë ruse që nuk lidhen me ushtrinë janë tkurrur me 5.4% që nga fillimi i vitit.
Sektorët e prekur, nga çimentoja te automjetet
Për të shmangur rritjen e papunësisë, kompanitë po adoptojnë masa “anti-krizë” si shkurtimi i javës së punës, në vend të pushimeve masive. Reuters identifikoi gjashtë kompani, përfshirë titanë industrialë, që kanë shkurtuar javën e tyre të punës:
Cemros, prodhuesi më i madh i çimentos, kaloi në një javë pune 4-ditore deri në fund të vitit, duke përmendur rënien e ndërtimit dhe rritjen e importeve të lira nga Kina, Irani dhe Bjellorusia.
Avtovaz (prodhuesi më i madh i makinave) filloi një javë pune 4-ditore në fund të shtatorit, ashtu si prodhuesit kryesorë të furgonëve dhe kamionëve, si GAZ dhe Kamaz.
Alrosa, prodhuesi më i madh në botë i diamanteve të papërpunuara, uli pagat me 10% për stafin jo-operacional, si dhe ndaloi operacionet në depozitat më pak fitimprurëse.
Hekurudha ruse (me 700,000 punonjës) i ka kërkuar stafit të zyrave qendrore të marrin tre ditë pushim shtesë në muaj me shpenzimet e tyre, si pasojë e rënies së të ardhurave nga eksportet e qymyrit dhe naftës.
Kriza e qymyrit dhe çelikut
Sektori i qymyrit, i cili punëson rreth 150,000 njerëz, është goditur rëndë nga rënia e eksporteve. Zyrtarët rusë pohojnë se 30 ndërmarrje të qymyrit rrezikojnë falimentimin, ndërsa Mechel, një nga minatorët më të mëdhenj, ka pezulluar prodhimin në disa miniera. Në rajonin e Kuzbasit, 19,000 punëtorë qymyri thuhet se janë pushuar nga puna në gjysmën e parë të 2025-ës.
Edhe industria e çelikut po shfaq shenja problemesh. Një burim tha se po ndodh një “shkurtim i qetë” i stafit ndihmës në fabrikat e përpunimit të metaleve, për shkak të normave të larta të interesit, rublës së fortë dhe kërkesës së dobët.
Një ekonomie në stanjacion
Këto masa anti-krizë shfaqen pavarësisht nga një papunësi zyrtare në nivel rekord të ulët (2.1%). Megjithatë, të dhënat shtetërore tregojnë një rritje prej 3.3 herë të pagave të prapambetura krahasuar me një vit më parë.
Në total, rritja e PBB-së e Rusisë parashikohet të ngadalësohet ndjeshëm, duke rënë nga 4.3% në vitin 2024 në vetëm 1.0% këtë vit, sipas ministrisë së ekonomisë. Kjo ka detyruar qeverinë të ndërhyjë, duke ofruar mbështetje shtetërore, zbritje në transportin hekurudhor dhe shtyrje taksash për sektorët e prekur.
